माओवादी पाखें स्वायत्त गणराज्य घोषणा यायेगु निर्णय
एकीकृत नेकपा (माओवादी)या जातीय क्षेत्रीय मोर्चां आम हड्ताल नापं स्वायत्त गणराज्य घोषणा यायेगु निर्णय याःगु दु ।
बिहीवाः पार्टीया अध्यक्ष पुष्पकमल दाहाल 'प्रचण्ड', पार्टी पाखें गठित संयुक्त जनआन्दोलन समितिया सयोजक नापं माओवादी उपाध्यक्ष डा. बाबुराम भट्टराई लगायत नेतातय् उपस्थितिइ जूगु मार्चाया बैठकं मंसिर २६ निसें पुष ३ गते तक झिंस्वंगू गणराज्य घोषणा यायेगु निर्णय याःगु खः ।
माओवादीं स्वंगूगु चरणया आन्दोलन स्वरुप मंसिर ७ गते निसें थीथी मार्चाया ज्याझ्वः नापं पुष ५, ६ व ७ गते राजनीतिक हड्ताल घोषणा यायेधुंकूगु दु । पार्टीया संरचना नं संघीय संरचनाय् दुगुलिं आम हड्ताल न्ह्यः जातीय मोर्चातय्सं स्वायत्त गणराज्य घोषणा यायेगु निर्णय याःगु खः ।
थ्वस्वयां न्ह्यः निगू चरणया आन्दोलनय् हे स्वायत्त गणरज्य घोषणा यायेगु निर्णय याःगु माओवादीं राष्ट्रिय अन्तराष्ट्रिय दबाव वयेवं तयारी मगाःगु धासें उगु ज्याझ्वः लितकाःगु खः ।
माओवादीं स्वायत्त गणराज्य घोषणा याइगु खःसां अज्याःगु गणराज्यत सांकेतिक कथं जक जूगु व स्वायत्त प्रदेशय् समानान्तर सत्ता गठन मयाइगु खँ माओवादीं धाःगु दु । माओवादीं संविधानसभा राज्य पुनसंरचना समितिलय् जातीय व क्षेत्रीय आधारय् झिंस्वंगू स्वायत्त प्रदेशया प्रस्ताव यायेधुंकूगु दु ।
