बूगुयां निघौ लिपा हे अपरेशन
येँ (सन्ध्या टाइम्स)/ चितवनया भरतपुर अस्पतालय् छम्ह मचायात बूगुयां निघौ लिपा हे प्वाःया अपरेशन याःगु दु।
रत्ननगर नगरपालिकाय् च्वनीम्ह मोहन चौधरीया काय बुइवं हे तेपुचाय् प्वाः दयाच्वंगु खनेवं तत्काल अपरेशन याःगु खः।
तेपुचाय् प्वाः गनाः आन्द्रा तकं पिहां वयाच्वंगुलिं मचायात तत्काल अप्रेशन यायेमाःगु खँ अस्पतालं धाःगु दु ।
थनिं खुन्हु न्ह्यः अपरेशन याःम्ह उम्ह मचाया स्वास्थ्यस्थिति आः सामान्य दुगु खँ अस्पतालया सर्जक डा. प्रकाश रायमाझीं कनादीगु दु ।
अस्पतालं मचा बुइवं हे मचायात येँय् च्वंगु कान्ति बाल अस्पतालय् यंकेमाल धाःगु खःसां मचाया परिवारया आर्थिक अवस्थाया कारणं यंके मफुगुलिं सीमित साधन स्रोतया दथुइ भरतपुर अस्पतालय् हे शल्यक्रिया यानागु खँ नं डा. रायमाझीं कनादिल ।
तत्काल अपरेशन मयात धाःसा मचाया स्थिति झन हे नाजुक जुइगु जूगुलिं थःपिंसं अनुभवया आधारय् हे शल्यक्रिया यानागु खँ नं डा. रायमाझी कनादिल ।
