पर्साय् सरकारी ज्याकुथी तालं
येँ (सन्ध्या टाइम्स)/पर्साया तत्कालिन प्रमुख जिल्ला अधिकारी दुर्गाप्रसाद भण्डारीयात हातपात याःम्ह कृषि राज्यमन्त्री करिमा बेगमयात कारवाही यायेमाःगु माग यासें पर्साया निजामति कर्मचारीतय्सं थनिंनिसें अनिश्चितकालीन ई तकया निंतिं सरकारी ज्याकुथी तालं ग्वया बिउगु दु।
म्हिगः पर्साया फुक्कं सरकारी ज्याकुथी पेन डाउन यानाः ज्या ठप्प याःपिं कर्मचारीतय्सं थनिंनिसें फुक्कं हे ज्या ठप्प यानाः आन्दोलनय् कुहां वःगु खः ।
राज्यमन्त्री बेगमयात कारवाही यायेमाःगु माग यानाः वंगु कार्तिक २५ गतेनिसें हे कर्मचारीतय्सं आन्दोलन न्ह्याकूगु खःसां नं नागरिक समाजया प्रतिनिधि व कर्मचारीया दथुइ खँल्हाबल्हा जुयाः न्यान्हुया दुने मन्त्रीयात कारबाही यायेगु धाःसां नं सरकारं मन्त्रीयात कारबाही याइगु छुं हे संकेत मवयेवं कर्मचारीतय्सं थुगु आन्दोलन न्ह्याकूगु खः।
पर्साया फुक्कं सरकारी ज्याकू बन्द जुयाः अन भन्सार म्हयेगु लगायत सर्वसाधारण मनूतय् ज्या नापं प्रभावित जूगु दु ।
उखे सरकारं धाःसा प्रमुख जिल्ला अधिकारी भण्डारीयात पर्साय् मतसे आः केन्द्रय् सःतातःगु दु। भण्डारीं थुगु काण्ड जुइ स्वयां न्ह्यः हे थःत पर्सां मेथाय् सरुवा याना बी माल धकाः माग यानाच्वंगु खः ।
