नेप्से कुहां वनेगु क्रम जारी
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारय् आपालं कारोबार कम्पनीया शेयर भाः कुहां वनेवं नेप्से परिसुचक म्हिगः नं कुहां वंगु दु। शेयर बजारय् कारोबार शुरु जुइवं छुं ई सामान्य थहां वंगु नेप्से करीब बाघौ लिपा कुहां वनेगु शुरु जूगु खः। कारोबार बन्द जुइ घौछि न्ह्यः नेप्से बुलुहुँ हाकनं थहां वंगु खःसां आशा याःकथं धाःसा थहां वने मफुत। स्टक एक्सचेन्जया कथं कारोबार कम्पनी मध्ये स्वीस्वंगू कम्पनीया शेयर भाः कुहां वःगु दु ।
वाणिज्य बैंक लगायतया आपालं कम्पनीया शेयर भाः कुहां वनेवं नेप्से परिसुचक म्हिगःया शेयर कारोबारय् १ दशमलव ८६ अंकं कुहां वनाः ५४१ दशमलव ५५ अंकय् थ्यंगु दु। सेन्सेटिभ शुन्य दशमलव ३२ अंकं कुहां वन। फ्लोट इन्डेक्स नं शुन्य दशमलव ३ अंकं कुहां वंगु दु ।
नेपाल स्टक एक्सचेन्जय् जुयाच्वंगु शेयर कारोबारं लगातार नेप्से परिसुचक कुहां वयेगु नेप्सेय् अप्वः प्रभाव लाकीगु वाणिज्य समुहया परिसुचक २ दशमलव ६२ अंकं कुहां वनाः ५११ दशमलव २१ अंकय् थ्यंगु दु। उखे मालिका विकास बैंकया प्रमोटर शेयर लगायत मेमेगु विकास बैंकया कारोबार नं कुहां वयेवं विकास बैंक समुहया सुचक ५ दशमलव ६२ अंकं कुहां वनाः ६०६ दशमलव ७१ अंकय् थ्यन। अथे हे फाइनान्स समुह शुन्य दशमलव ५४ अंकं कुहां वनाः ५६८ दशमलव ३२ अंकय् थ्यन। कुहां वःगु सुचकय् दकलय् अप्वः वीमा समुह ११ दशमलव ४६ अंकं कुहां वयेवं ५७८ दशमलव ७७ अंकय् थ्यंगु दु ।
म्हिगःया कारोबारय् थहां वंगु छगू जक अन्य समुहया कारोबार १ दशमलव १८ अंकं थहां वनाः ५९९ दशमलव २१ अंकय् थ्यंगु दु। नेप्से परिसुचक थुकथं निरन्तर कुहां वनाः वंगु स्वदँ न्ह्यः थुखेया दकलय् म्होचागु विन्दुइ थ्यंगु दु ।
स्टक एक्सचेन्जय् म्हिगः न्यागू करोड ख्वीखुगू लाख झिंन्हय्द्वः तका दांया चय्छद्वः व प्यसः व न्यय्निगू कित्ता शेयर न्याये-मी जु ल।
कारोबार कम्पनी मध्ये नेपाल लाइफ इन्स्योरेन्स कम्पनीं दकलय् अप्वः छगू करोड नीस्वंगू लाख झिंस्वद्वः तका दांया कारोबार याःगु दु। पाटन फाइनान्स लिमिटेडं दकलय अप्वः कमे याःगु दुसा मालिका विकास बैंकया प्रमोटर शेयरं दकलय् अप्वः द्यापं फःगु दु ।
नेप्सेय् म्हिगः निसें कारोबार शुरु याःगु अरुण भ्याली हाइड्रो पावरया प्रति कित्ता ७९०/- तका व क्रिष्टल फाइनान्सया शेयर प्रति कित्ता ५९०/- तकां कारोबार जुल ।
