आशीर्वाद व रिमोट कन्ट्रोल पाखें सरकार गठन जूगु मखु : प्रम
प्रधानमन्त्री माधवकुमार नेपालं वर्तमान सरकार सुयां आशीर्वाद व रिमोट कन्ट्रोल पाखें गठन जूगु मखसें प्रजातन्त्रवादी दलतय् समर्थनं स्थापित जूगु खँ धयादीगु दु ।
बिहीवाः लुम्बिनी विकास कोषया बैठकय् न्ववानादिसें प्रधानमन्त्री नेपालं माओवादीं धाथें थ्व सरकार गठन मजूगु स्पष्ट यानादिसें सरकार प्रजातन्त्रवादीतय् समर्थनं गठन जूगु धयादिल । माओवादी थःम्हं हे सरकार त्वःतगु दाबी यानादिसें नेपालं एमाले सहमतिया आधारय् न्ह्याः वने चाहे जूगुलिं दक्वं दलतय्त नापं ज्वनाः न्ह्याः वनीगु धयादिल ।
अथेहे बिहीवाः एमाले रुपन्देही क्षेत्र नम्बर ५या अधिवेशन उल्लेज्या यानादिसें एमाले वरिष्ठ नेता नापं जुयादिम्ह प्रधानमन्त्री नेपालं माओवादी नाप थःगु सेना व ल्वाभः दुगुलिं वयात दुनियां विश्वास यायेमफइगु धयादिल । वयेकलं माओवादीं आक्रामक गतिविधि जारी यानाच्वंसाः हिटलर थें पतन जुइगु ख्याच्वः बियादिल ।
माओवादी प्रति आक्रामक खनेदुम्ह प्रधानमन्त्री नेपालं माओवादीं सरकार चले यायेमफया बिस्यूवंगु द्वपं बियादिसें आः आन्दोलन यायेगुया छुं अर्थ मदुगु धयादिल । वयेकलं माओवादीया गुलाःया सरकारं स्वयां वर्तमान खुलाः दुगु सरकारं अप्वः ज्या याःगु दाबी यानादिसें थ्व सरकार छुं हालतं क्वमदलीगु धयादिल ।
