विद्यार्थीतय्सं प्रधानमन्त्रीयात ज्ञापनपौ
त्रिभुवन विश्वविद्यालयं शुल्कवृद्धि याःगु विरोद्धय् आन्दोलन यानाच्वंगु झिंस्वंगू विद्यार्थी संगठनतय्सं प्रधानमन्त्री माधवकुमार नेपालयात ज्ञापनपौ लःल्हाःगु दु ।
बिहीवाः प्रधानमन्त्री निवास बालुवाटार वनाः विद्यार्थीतय्सं शुल्क वृद्धिया निर्णय लितकायेमाःगु धासें ज्ञापनपौ लःल्हाःगु खः । विद्यार्थीतय्सं शुल्क वृद्धिया निर्णय लितमकाःतल्ले आन्दोलन यानाच्वनेगु अडान काःगु दु ।
ज्ञापनपौ लःल्हाये धुकां प्रधानमन्त्री थुकीयात बारे मध्यमार्गी लँपू माला समस्या समाधान यायेत विद्यार्थीतय्त इनाप यानादीगु खः । वयेकलं त्रिविया शुल्क पुर्ननिर्धारण यायेत आवश्यक जुसां छक्वलं १० प्रतिशत बढे याःगु बारख त्रिविनाप खँल्हाबंला यायेगु कनादिल ।
विद्यार्थी संगठनतय्सं बिहीवाः हे त्रिवि सहकुलपति व शिक्षामनत्री रामचन्द्र कुशवाहायात नं ज्ञापनपौ लःल्हाःगु दुसाः देयन्यंकया क्याम्पस प्रमुखया कार्यकक्ष घौच्छि घेराउ याःगु दु ।
