उच्चस्तरीय राजनीतिक संयन्त्रं सरकार क्वदलीमखु : देउवा
नेपाली कांग्रेसया वरिष्ठ नेता शेरबहादुर देउवां उच्चीतरीय राजनीतिक संयन्त्रं सरकार परिवर्तनया निंतिं मजूगु खँ स्पष्ट यानादीगु दु । माओवादीं संयन्त्र निर्माण लिपाः सरकार नेतृत्वया बारे सहलह जुइगु धयाच्वंगु ईलय् देउवां संयन्त्रय् संविधान निर्माण व शान्ति प्रकृयाया बारे जक सहलह जुइगु धयादिल ।
धनगढीइ बिहीवाः जूगु छगू ज्याझ्वलय् न्वावानादिसें कांग्रेस नेता देउवां राजनीतिक संयन्त्रं संविधन निर्माण व शान्ति प्रकृयायात क्वचायेकेत सहज वातावरण निर्माण यायेगु ज्या जक याइगु धयादिल । वयेकलं राष्ट्रपतिया लपाः गलत सावित यायेत मेमेगू दलयात नैतिक समस्या उत्पन्न जूगुलिं माओवादीया मुद्दा बारे सहमति जुइमफुइगु दाबी यानादिल ।
पुलांम्ह प्रधानमन्त्री नं जुयादिम्ह देउवां सरकार परिवर्तन व राष्ट्रपतिया पलाः स्वयां बाहेक गुकथं सहमति मालेफइ धइगु विषयलय् सहलह जुयाच्वंगु धयादिसें राष्ट्रपतियात आक्षेप लगेमयायेगु खँय् माओवादी नं सहमत जुइधुंकूगु धयादिल ।
