माओवादी थ्वहे सरकारय् वयेमा : देउवा
नेपाली कांग्रेसया वरिष्ठ नेता व पुलांम्ह प्रधानमन्त्री शेरबहादुर देउवां वर्तमान सरकार परिवर्तन मजुइगु धयादिसें थ्वहे सरकारय् माओवादी वयेमाःगु खँ धयादीगु दु ।
नेपाली कांग्रेसया नेता टेकबहादुर चोख्यालया झिंस्वन्हुया पुण्यतिथिया लसताय् बुधवाः धनगढीलय् जूगु श्रद्धाञ्जली सभाय् ब्वति कायेत झायादिम्ह देउवां विमानस्थलय् पत्रकारत नाप खँल्हाबंला यानादिसें वर्तमान सरकार परिवर्तन मजुइगु धयादिसें थ्वहे सरकार माओवादीं ब्वति कयाः राष्ट्रिय सरकार दयेकेमाः धयादिल ।
बजेट पास याके बीगु माओवादीया निर्णय सकारात्मक जूगु धयादिसें देउवां थुकीं सहमतिया निंतिं सहज वातावरण निर्माण याःगु धयादिल । वयेकलं राष्ट्रपतिया पलाः गलत जूगु धकाः संकल्प प्रस्ताव सदनय् यंकेत नैतिकतां नं मबीगु धयादिल । वयेकलं झिसं हे प्रधानसेनापतियात चीकेगु निर्णय दिकेमाल धकाः इनाप यानाःगु खँ कनादिसें आः झिसं हे व पलाः मिलेमजूगु धकाः गुकथं धायेगु धकाः न्ह्यसः तयादिल ।
