सैनिक स्वरुपया नेवाः सुरक्षा दस्ता
येँ (सन्ध्या टाइम्स)/थ्वहे वइगु पुस ११ गते जुइत्यंगु नेवाः स्वायत्त राज्य घोषणा ज्याझ्वःया लागिं नेवाःतय्गु बिस्कं सुरक्षा दस्ता नं तयार याइगु जूगु दु ।
नेवाः स्वायत्त राज्य मंकाः संघर्ष समितिपाखें सीदु कथं उगु सुरक्षा दस्ताय् द्वःछिम्ह नेवाः ल्याय्म्हत दइसा उकिया स्वरुप सेनाया थें जुइ। अनुशासन व स्वरुप सेनाया थें जूसां थ्व सेना धाःसा मखुगु खँ थ्व सम्बन्धी तयारी यानाच्वनादीम्ह भाजु उमेश स्थापितं 'सन्ध्या टाइम्स' यात कनादिल। थ्व दस्ताया नां 'नेवाः सुरक्षा' तःगु दु। थुकियात माःपिं कार्यकर्ता थीथी क्लब व खलः पुचःपाखें काइ।
थुकी मुक्कं न्यागू कम्पनी दइ। प्रत्येक कम्पनीइ प्यंगू प्लाटुन दइसा हरेक प्लाटुनय् प्यंगू युनिट दइ। अले हरेक युनिटय् १० निसें १५ म्ह तक दुजः दइ। संख्याया ल्याखं स्वयेबलय् थुकी सेनाया छगू ब्रिग्रेडय् स्वयां अप्वः दुजः दइ।
थ्व दस्ताया थःगु हे पोसाक नं दइ। हाकुगु ट्राय्क सुट व हाकुगु हे क्याप थुकिया पोसाक जुइ ।
च्वय्या तहलय् च्वंपिं छुं दुजःतय्त अन्तर्राष्ट्रिय मान्यता कथंया चिं नं बीगु खँ स्थापितं कनादिल ।
थुमित तालिमया रुपय् सामान्य ब्यायाम व सैन्य अनुशासन सम्बन्धी जानकारी बीगु ज्या जुइ। थुकिया अनुशासन व चेन अफ कमाण्ड नं सेनाया थें हे जुइगु खँ नं वय्कलं कनादिल।
पुस ११ गते कुन्हु थ्व सुरक्षा दस्तां सतकय् मार्च पास याइ। लिसें नेवाः स्वायत्त राज्यया घोषणा कथं नेवाः ध्वाँय् ब्वयेकीबलय् थ्व दस्तां नेवाः राष्ट्रिय गान हालाः उगु ध्वाँय्यात सलामी बी ।
थ्वयां लिपा थ्व दस्ता नेवाः राज्यया विरोधय् वइपिंत प्रतिकार यायेगु ज्याय् खटे जुइगु खँ धाःगु दु ।
