माओवादीं संसदीय भूमिका मम्हितू
येँ (सन्ध्या टाइम्स)/ प्रमुख प्रतिपक्ष एनेकपा (माओवादीं) लिपांगु इलय् वयाः व्यवस्थापिका संसदय् प्रतिपक्षया भूमिका म्हितेगु ज्या याना महःगुलिं आः गनं माओवादीं संसदीय मोह त्वःता हःगु जकं मखुला धकाः न्ह्यसः तयाहःगु दु ।
विशेष यानाः माधव नेपालया सरकार वयेधुंकाः माओवादीं प्रतिपक्षया ल्याखं रचनात्मक भूमिका म्हितेगु सिबें संसदीय व्यवस्थायात हे बेवास्ता यानाच्वंगु दु ।
संसदीय व्यवस्थाय् प्रमुख प्रतिपक्षं म्हितीगु भूमिका धइगु सरकारया नीति नापं बजेट असफल यानाः थःपिनि नेतृत्वय् सरकार दयेकेत संसदय् हे च्वनाः विरोधया सः तयेगु नापं फरक मत तयाः फुसा मतदान तकं याकेगु खः। तर माओवादीं आः तक सदन दुने च्वनाः अज्याःगु संसदीय ज्या धाःसा छगू हे याःगु मदुनि ।
वर्तमान सरकारं न्हापा नीति तथा कार्यक्रम हःबलय् नं छम्ह निम्ह जक सभासद्त छ्वयाः ज्याझ्वः पारित याके बिउगु खःसा म्हिगः बजेट नं अथे हे यानाः पारित याके बिल। बजेट पारित याकेगु ज्याय् प्रतिपक्षीया छुं हे भूमिका मक्यंगुलिं माओवादीं संसदीय अभ्यासयात अझ नं मान्यता मबिउनिगु स्पष्ट खने दु धकाः नं धयाहःगु दु ।
