थौं नगामय् व कन्हय् पांगाय् जात्रा

किपू (सन्ध्या टाइम्स)/येँया दक्षिण पश्चिम लागाय् जुइगु न्हय्गां जात्राया झ्वलय् थौं बहनी नगामय् जात्रा जुइत्यंगु दु। नगांया पीगनय् धाल्चा ज्वनाः मनूत दिगिदिगि खाइगु उगु जात्रा चान्हय् जुइगु खः। उकियात धाल्चा खाकेगु जात्रा धाइ। अथे हे किपूया हे पांगाय् कन्हय् जात्रा जुइ। पांगाय् बिष्णुदेवी व बालकुमारीयात मू द्यः कथं द्यःखः क्वबियाः थ्व जात्रा याइगु खः। जात्राया झ्वलय् थौं पांगाय् मूयाः खःसा किपुली छ्वय्लाभू खः। किपुली धाःसा कंस जक इन्द्रायणी द्यःखः जात्रा जुइ ।