भिक्षु सोभितया प्रब्रज्या दिवस
येँ (सन्ध्या टाइम्स)/गणमहाविहारय् च्वनाबिज्याःम्ह भिक्षु सोभित स्थविरया नीच्याक्वःगु प्रब्रज्या दिवस वइगु सनिवाः थीथी ज्याझ्वः यासें हनेत्यंगु दु। ज्याझ्वः कथं उकुन्हु न्हिनय् नेपाःया थेरवाद बुद्ध धर्म प्रचार प्रचारया लागिं थःगु जिवंकाःछि ई बियाबिज्याःपिं भिक्षु गुणघोष महास्थविर व अनागारिका ञाणशीलापिंत अभिनन्दन समर्पण याइगु ज्याझ्वः दु। धर्म विजय पदनमया ग्वसालय् जुइगु उगु हे ज्याझ्वलय् बुद्धपूजा, परित्राण पाठ, शैक्षिक सामग्री इनेज्या नापं वीर अस्पतालया विरामीतय्त सिसाबुसा इनेज्या ग्वसाः नं दयेकातःगु दु ।
उकुन्हु सुथय् प्रज्ञानन्द स्मृति ज्ञानमाला भजन खलः यल व सुभाषित ज्ञानमाला संघ गणमहाविहारपाखें विशेष ज्ञानमाला भजन न्यंकीगु नं ज्याझ्वः क्वःछिनातःगु दु। अथे हे ज्ञानमाला भजनया उत्थान व समुन्नतिया लागिं विशेष योगदान यानादीपिं भृगुराम श्रेष्ठ, भीमबहादुर नकर्मि, किरण शाक्य, आनन्द शाक्य, रामरत्न तुलाधर व हिराशोभा शाक्यपिंत अभिनन्दन व सम्मान समर्पण याइगु नं ज्याझ्वः दु। सनिलय् बुद्धपूजा व दिपावली यासें पुण्यामोदन यानाः ज्याझ्वः क्वचाइ ।
