नेप्से कुहां वनेगु क्रम जारी
येँ (सन्ध्या टाइम्स)/स्टक एक्सचेन्जय् जुयाच्वंगु शेयर कारोबारं नेप्से परिसुचक कुहां वयेगु क्रम अझं दिउगु मदुनि। म्हिगःया कारोबारय् नं नेप्से परिसुचक कुहां वयेवं वंगु निदँ न्ह्यःया हे दकलय् क्वय्या स्थितिइ थ्यं वःगु दु। शेयर कारोबार जूगु कम्पनीमध्ये इन्टरनेशनल लिजिङ्ग एण्ड फाइनान्स लगायतया अधिकांश कम्पनीया शेयर भाः कुहां वयेवं म्हिगः नेप्से ५ दशमलव ६२ अंकं कुहां वयाः ५४३ दशमलव ४१ अंकय् थ्यंगु दु। सेन्सेटिभ नं २ दशमलव शुन्य ८ अंकं कुहां वयाः १३४ दशमलव २५ अंकय् थ्यंगु दुसा फ्लोट शुन्य दशमलव शुन्य दशमलव ५३ अंकं कुहां वनाः ५२ दशमलव शुन्य ३ अंकय् थ्यंगु दु ।
बजाः चालेवं छुं ई लिपा हे थहां वंगु नेप्से झण्डै घौछि लिपा कुहां वयेगु शुरु जूगु खः। नेप्से कुहां वयेगु क्रम कारोबारया अन्त तकं कायम जुल। स्टक एक्सचेन्जया कथं नेप्से थुकथं कुहां वःगु वंगु नीगुलाया दुने हे दकलय् न्युनतम विन्दुइ थ्यंगु दु। थ्व स्वयां न्ह्यः ०६४ जेठ लाय् नं नेप्से कुहां वयाः ५४९ दशमलव ९६या विन्दुइ थ्यंगु खः ।
स्टक एक्सचेन्जय् म्हिगः जूगु शेयर कारोबारय् दकलय् अप्वः इन्टरनेशनल लिजिङ्गया शेयरय् प्रति कित्ता २३३/-, नेप्सेय् अप्वः प्रभाव लाकीगु स्टायण्डर्ड चार्टर्ड बैंकया ४०/-, एभरेष्ट बैंकया ४०/- व नविल बैंकया शेयरय् ३०/- तका कुहां वयेवं वाणिज्य समुह ५ दशमलव ६७ अंकं कुहां वनाः ५१३ दशमलव ८३ अंकय् थ्यंगु दु। विकास बैंक समुहया सुचक ८ दशमलव २५ अंकं कुहां वयाः ६०९ दशमलव १८ अंकय् थ्यंगु दु। अथे हे फाइनान्स समुहया सुचक दकलय् अप्वः २२ दशमलव ५ अंकं कुहां वनाः ५६९ दशमलव ४४ अंकय् थ्यंगु दु ।
कारोबारं थहां वंगु छगू जक समुह जलविद्युतया सुचक ७ दशमलव १२ अंकं थहां वनाः ८०४ दशमलव ५९ अंकय् थ्यन। म्हिगः शेयर बजारय् वीमा व अन्य समुहया धाःसा कारोबार मजुल ।
न्यय्खुगू कम्पनीया चय्गुद्वः व गुसः व चय्स्वंगू कित्ता शेयर न्याये-मी जुयाः न्यागू करोड नीच्यागू लाख न्हय्छद्वः तका दांया कारोबार जुल। कारोबार जूगु कम्पनी मध्ये प्राइम कमर्सियल बैंकया दकलय् अप्वः १४,०७० कित्ता शेयर न्याये-मी जूगु दुसा दकलय् अप्वः चय्न्हय्गू लाख झिंच्याद्वः तका दांया नं कारोबार याःगु दु। जनरल फाइनान्स लिमिटेडं हाकनं छक्वः अप्वः कमे याःगु दुसा इन्टरनेशनल लिजिङ्ग एण्ड फाइनान्सं दकलय् अप्वः द्यापं फयेमाःगु दु ।
