हज यात्राया बील भर्पाइ क्यनेत गृहयात निर्देशन
व्यवस्थापिका संसदया सार्वजनिक लेखा समितिं मक्क मदिना हज यात्राया झ्वलय् दच्छि न्ह्यः जूगु खर्चया बील भर्पाइ क्यनेत गृह मन्त्रालययात निर्देशन ब्यूगु दु ।
लेखा उपसमितिं हज यात्राया झ्वलय् आर्थिक अनियमितता जूगु प्रतिवेदन सार्जजनिक यायेवं बुधवाः च्वंगु समितिया बैठकं गृह सचिव गोविन्द कुसुमयात अज्याःगु निर्देशन ब्यूगु खः । बैठकं आर्थिक अनियमितताया बारे तत्कालीन गृहमन्त्री बामदेव गौतव व हज कमिटीया अध्यक्ष ताज मोहम्मद मियाँनाप नं स्पष्टिकरण काःगु दु ।
समितिया बैठकय् उपस्थित तत्कालीन गृहमन्त्री गौतमं प्रतिवेदन स्विकार्य जुइमफुगु धयादिल । वयेकलं पिनेया खँ जोरे यानाः बदनाम यायेगु मनसायं उपसमितिं प्रतिवेदन तयार याःगु व प्रतिवेदन पूर्वाग्रही जूगु द्वपं बियादिल ।
हज यात्रीया निंतिं दच्छि न्ह्यः व्यवस्था याःगु विमान भाडा वापत ७७ लख स्वयां अप्वः अनियमितता जूगु उपसमितिया प्रतिवेदनय् न्ह्यथंनातःगु दु । अथेहे साउदी अरवया होटलय् खर्च याःगु ३ करोड स्वयां अप्वः पेश्की यथावत जूगु खँ क्यंसें तत्कालीन गृहमन्त्री व हज कमिटीया अध्यक्ष मार्फत भर्पाइ यायेमाःगु उपसमितिं निष्कर्ष पिकाःगु खः ।
