बजेट औपचारिक रुपं पारित
ताः ई न्ह्यः निसें पारित जुइमफुगु आर्थिक दँ २०६६/६७या बजेट बुधवाः औपचारिक रुपं पारित जूगु दु ।
बुधवाःया व्यवस्थापिका बैठक न्ह्यायेवं अर्थमन्त्री सुरेन्द्र पाण्डें आर्थिक, राष्ट्रिय ऋण मुंकेगु व ऋण व जमानत झिंन्हय्क्वःगु विधेयकयात संसदय् न्ह्यब्वयादीगु खः । उगु विधेयकय् सुनां नं टिप्पणी मयायेवं सभामुख सुवाष नेम्वाङं सर्वसम्मतं बजेट पारित जूगु घोषणा यानादीगु खः । मंगलवाःया बैठकय् हे बजेट सर्वसम्मत जूगु खःसां स्वंगू विधेयक संसदय् प्रस्तुत मजुनीगु व पारित यायेमानीगुलिं थौंया बैठकं जक बजेट औपचारिक रुपं पारित जूगु घोषणा याःगु खः ।
प्रमुख प्रतिपक्षी दल एनेकपा (माओवादी)या सभासद्तय्सं लगातार प्यलाः तक संसद अवरोध याःगुलिं वंगु असारय् न्ह्यब्वःगु बजेट नकतिनि पारित जूगु खः । माओवादीं बजेट पारित याके बीगू निंतिं जक स्वन्हुया लागिं संसदया बैठक चालेबीगू निर्णय याःगु खः । माओवादी पाखें थौंया बैठकय् नं सांकेतिक विरोध स्वरुप निम्ह जक सभासद्तय् उपस्थिति दुगु खः ।
व्यवस्थापिका संसदया मेगू बैठक बिहीवा: च्वनीगु जूगु दु ।
