तिब्बती प्रतिनिधिमण्डल व प्रम दथुइ खँल्हाबंला
चीनया स्वशासित क्षेत्र तिब्बतया कार्यकारी उपप्रमखु हाओ फाङया नेतृत्वय् वःगु झिंछम्ह दुजः दुगु प्रतिनिधिमण्डलं बुधवाः प्रधानमन्त्री माधवकुमार नेपालयात नापलाना खँल्हाबंला याःगु दु ।
न्यान्हून्यंकया नेपाः भ्रमणय् वःगु उगु पुच व प्रधानमन्त्री दथुइ जूगु खँल्हाबंलाय् तिब्बती प्रतिनिधिमण्डलं नेपाः व तिब्बती सिमाय् दुगु शिक्षण संस्थायात ग्वाहालि यायेगु प्रतिबद्धता प्वंकूगु दु । प्रधानमन्त्री नेपालं धाःसा नेपाःया भूमि छ्यलाः चीन विरोधी गतिविधि जुइमबीगु खँ धयादिल ।
खँल्हाबंलाय् नेपाःया राजनीतिक अवस्था, तिब्बतय् अप्वयाच्वंगु अन्तराष्ट्रिय च्यूताः, तिब्बत-येँ तप्यंक बस सेवा आदिया बारे खँल्हाबंला जूगु खँ प्रधानमन्त्रीया प्रेस सल्लाहकार बिष्णु रिजालं कनादिल ।
अथेहे उगु प्रतिनिधिमण्डलं नेपाली कांग्रेसया सभापति गिरिजाप्रसाद कोइराला व एमालेया अध्यक्ष झलनाथ खनालयात नं बुधवाः नापलानाः निगू देय्या स्वापू, आपसी स्वपू आदिया बारे खँल्हाबंला याःगु दु । थौं हे तिब्बती प्रतिनिधिमण्डलं उपप्रधान नापं परराष्ट्रमन्त्री सुजाता कोइराला व गृहमन्त्री भीम रावलयात नं नापलाइगु ज्याझ्वः दु ।
