आर्थिक दँ २०६६/६७या बजेट पारित
आर्थिक दँ २०६६/६७ या बजेट (विनियोजन विधेयक) सर्वसम्मतं पारित जूगु दु । मंगलवाः अर्थमन्त्री सुरेन्द्र पाण्डें व्यवस्थापिका संसदया बैठकय् विनियोजन विधेयक निर्णयार्थ पेश यानादीगु खः ।
प्रमखु प्रतिपक्षी दल एनेकपा (माओवादीं) संसदय् सांकेतिक विरोध स्वरुप निम्ह सभासदत जक उपस्थित जूगु कारणं सत्ता गठबन्धनय पार्टीया सभासद्तय्सं बजेट सर्वसम्मतं पारित जूगु खः । अर्थमन्त्री पाण्डें वंगु असार २९ गते संसदय् २ सय ८९ अर्ब ९३ करोडया बजेट प्रस्तुत यानादीगु खः ।
प्यलाः न्ह्यः निसें माओवादीं नागरिक सर्वोच्चताया माग यासें सदन अवरोध यानाच्वंगुलिं बजेट पारित जुइमफुगु खः । माओवादीं बजेट पारित याये बीगू निंतिं सोमवाः निसें स्वन्हुया निंतिं सदन चले यायेबीगू निर्णय याःगु खः ।
बजेट पास याये स्वयां न्ह्यः म्हिग प्रस्तुत याःगु थीथी झिंखुगु मन्त्रालय सम्बन्धी विनियोजन विधेयकय् सभासद्तयं न्ह्यसः तःगु खःसा उकी सम्बन्धित मन्त्रालयया मन्त्रीतय्सं लिसाः बियादीगु खः । प्रधानमन्त्री माधवकुमार नेपाल, उपप्रधान नापं परराष्ट्रमन्त्री सुजाता कोइराला, अर्थमन्त्री पाण्डे, गृहमन्त्री भीम रावल, सूचना व संचार मन्त्री शंकर पोखरेल, शान्ति मन्त्री रकम चेम्जोङ, सामान्य प्रशासन मन्त्री प्रभाकर प्रधानाङ्ग (रविन्द्र क्षेष्ठ) लगायत मन्त्रीतय्सं विनियोजन विधेयक २०६६या बारे सभासद्तय्सं न्यंगू न्ह्यसःया लिसः बियादीगु खः ।
