देशय् ऐतिहासिक उर्जा संकट
कन्हसंनिसें लोडशेडिङ अझ निघौ थपे यानाः न्हिं १२ घौ याइगु जूगु दु । विद्युत अभावयात ध्यानय् तयाः सरकारं देशय् उर्जा संकटया समेत घोषणा याःगु दुसा देशय् तत्काल उर्जा संकट टरे यायेगु निंतिं थीथी कथंया ज्याझ्वःत नं घोषणा याःगु दु । तर सरकारया थ्व घोषणा छुं नं कथं उत्साहजनक धाःसा जुयाच्वंगु खने मदु । सरकारया थ्व घोषणापाखें नं स्पष्ट याःगु दु कि देश मेगु छुं दँ तक थथे हे लोडशेडिङया मार फयेत बाध्य जुइतिनि ।
नेपाली जनताया जनजीवनयात थौं स्वयां पीदँ न्ह्यःया अवस्थाय् लित यंकाबिउगु दु । आः ब्वनेमाःपिं विद्यार्थीतय् ब्वनेज्यायात थुकिं प्रभावित याइगु ला दे हे दु । उकिया नापनापं छुं भचा ल्यनाच्वंगु उद्योगधन्दायात पातालय् थ्यंका बीगु नं निश्चित दु । समग्रय् धायेगु खःसा उर्जाया थ्व अभावं देय्या विकासयात दशकौं लिउने लाका बीगु खनेदु । मेखें धायेगु खःसां न्हूगु नेपाः दयेकेगु नेपाली जनताया म्हगसय् वःगु थ्व छगू तःधंगु चलः खः । थ्व संकटं मुक्त जुइगु लागिं सरकारं थीथी कथंया प्याकेज घोषणा याःसां तुरुन्त मुक्त जुइगु छुं उपाय धाःसा मदु । थ्व स्वयां न्ह्यःया सरकारतय्सं उर्जा शक्ति विकासय् गबलें नं ध्यान मतःगु व जलविद्युतया विकासय् ज्या स्वयां अप्वः राजनीति याना जूगुया थ्व छगू बांमलाःगु लिच्वः खः । अनावश्यक राजनीतिं यानाः नेपालं न तःधंगु परियोजना दयेके फत न चीधंगु हे शुरु याके फत । नेपाःयात माःगु ७५० मेगावाटय् आः ४०० ति हे जक पूर्ति याये फयाच्वंगु दु । धायेसातकि ४०० मेगावाट विद्युत पिकायेगु अःपुगु खँ मखु । समग्र नेपाः हे छप्पँ जुयाः थुकी लगे जुइमाःगु ई वःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
