बृहत मार्चा निर्माणया तयारी : चन्द
एनेकपा (माओवादी)पाखें गठित संयुक्त राष्ट्रिय जनआन्दोलन समितिया महासचिव नेत्रविक्रम चन्दं संसद दुने व पिने च्वंगु राजनीतिक दल, राष्ट्रवादी व सच्चा गणतन्त्रवादीत दुथ्याःगु बृहत मंकाः मोर्चा गठन यायेगु तयारी जुयाच्वंगु खँ धयादीगु दु ।
जनसंचार अभियानं मगंलवाः येँ याःगु छगू ज्याझ्वलय् न्ववानादिसें वयेकलं संसद दुने व पिनेया शक्ति जनाः बृहत मोर्चा गठन यानाः स्वंगू चरणया आन्दोलनयात सशक्त दयेकीगु धयादिल । वयेलकं थुकी देशभक्त वामपन्थी व गणतान्त्रिक शक्तित दुथ्याइगु दाबी यानादिल ।
माओवादीया स्थायी समिति दुजः नं जुयादिम्ह चन्दं माओवादीं यायेत्यंगु आन्दोलन छुं नं कथंया विद्रोह व सरकार निर्माण यायेगु निंतिं मजूगु धयादिसें थ्व जनयुद्ध व जनआन्दोलनया उपलब्धी रक्षा व जनतां प्राप्त याये ल्यं दनीगु अधिकारयात पूर्णता बीत जूगु दाबी यानादिल । वयेकलं वर्तमान कतामरी सरकारं जनताया सः मन्यन व निर्धारित ईलय् हे न्हूगु संविधान निर्माण यायेमब्यूसाः जनताया असन्तोष तःधंगु विद्रोहलय् परिणत जुइगु धयादिल ।
