नेवाः राज्यया लागिं अष्टमातृका यात्रा
येँ (सन्ध्या टाइम्स)/ ज्यापु महागुथिं नेवाः स्वायत्त राज्य घोषणा ज्याझ्वःया निंतिं येँय् तःजिक अष्टमातृका यात्रा यायेत्यंगु दु। महागुथिया म्हिगः जूगु केन्द्रीय दुजः, पार्षद् व स्वनिगःया थीथी गांया प्रतिनिधितय्गु मुँज्यां नेवाः स्वायत्त राज्य घोषणा ज्याझ्वः ताःलाकेत ज्यापुतय्त सांस्कृतिक रुपं सतकय् क्वत हयेमाःगु ठहर यासें उगु कथंया यात्रा पिकायेगु निर्णय याःगु खः ।
स्वनिगःया गां गामंनिसें शहर शहरय् तकं च्वंपिं ज्यापुतय्त धिमेनिसें थीथी कथंया सांस्कृतिक बाजं थाकाः, ज्यापु ज्यापुनी वसः पुंकाः सांस्कृतिक यात्रा पिकासें नेवाः राज्य घोषणा याइगु दशरथ रंगशाला यंकीगु ज्याझ्वः दु ।
उगु ज्याझ्वः ताःलाकेत माःगु तयारी ज्यापु महागुथिया केन्द्रीय ज्यासना पुचलं याइगु खँ धाःगु दु ।
उगु हे कथं थ्वहे वइगु मंसिर २७ गते नेवाः स्वायत्त राज्यप्रति समर्थन यासें नेवाः जातीय खलः पुचःतय्सं येँया बसन्तपुली छगू ज्याझ्वः यासें मंकाः प्रतिवद्धता व्यक्त याइगु ज्याझ्वः दु। म्हिगःया मुँज्यां उगु ज्याझ्वलय् सक्रिय रुपं ब्वति कायेगु खँ नं क्वःछ्यूगु जानकारी ज्यापु महागुथिया मूछ्यांज्ये राजभाइ जकःमिं 'सन्ध्या टाइम्स' यात बियादिल ।
