'विद्रोहया निंतिं नं सरकार हे माः'
येँ (सन्ध्या टाइम्स)/प्रमुख प्रतिपक्षी एकीकृत नेकपा (माओवादी) या म्हिगः क्वचाःगु केन्द्रीय कमिटीया मुँज्यां देशय् विद्रोह यायेत नं सरकारया मोर्चा आवश्यक जूगु ठहर यासें आः सरकारयात नं प्राथमिकता बियाः न्ह्याः वनेगु निर्णय याःगु दु ।
थ्व सिबें न्ह्यः च्वंगु माओवादी केन्द्रीय कमिटीया मुँज्यां सरकारयात प्राथमिकता मबिसे न्हापांगु प्राथमिकता सतक व सदनयात बियातःगु खःसा आः वयाः ई हिलावंगु नापं सरकार नं विद्रोहया निंतिं छगू महत्वपूर्णगु मोर्चा खः धइगु ठहर यासें उगु कथं सरकारयात प्राथमिकताय् लाकूगु खः धकाः छम्ह केन्द्रीय नेतां 'सन्ध्या टाइम्स'यात कनादिल।
वर्तमान सरकारय् मवनेगु व न्हूगु हे सरकार दयेकेगु जूसा जक वनेगु, फयांफत्तले सरकारया नेतृत्व थःगु हे पार्टीं कायेगु अले नेतृत्व नं पार्टीया नायः प्रचण्डयात हे याकेगु निंतिं सहमति ब्वलंकेगु खँ जूगु जानकारी नं वय्कलं बियादिल ।
