झिक्वःगु राष्ट्रिय बौद्ध सम्मेलन
येँ (सन्ध्या टाइम्स)/बौद्ध धर्मया राष्ट्रिय संगठन धर्मोदय सभाया ग्वसालय् थ्वहे वइगु पुस ५ व ६ गते निन्हुयंकं लुम्बिनीइ झिक्वःगु राष्ट्रिय बौद्ध सम्मेलन जुइगु जूगु दु। सम्मेलनया उलेज्या राष्ट्रपति डा. रामबरण यादवं यानादी।
सम्मेलनय् 'लुम्बिनीया विकास: राष्ट्रिय प्रतिष्ठा' विषयय् ज्यापौ न्ह्यब्वइसा २०६८ सालय् जुइगु राष्ट्रिय जनगणनाया निंतिं बौद्ध जागरण, लुम्बिनी विकास व बौद्ध शिक्षा, धर्म निरपेक्षता व लोकतन्त्र नापं लुम्बिनी: राष्ट्रिय गौरवया सुरक्षा यानाः प्यंगू विषयय् सहलह जुइ ।
लुम्बिनीइ च्वंगु धर्मोदय सभाया विहारय् जुइगु उगु ज्याझ्वःया झ्वलय् पुस ३ गते अन बुद्धया मूर्ति स्थापना याइगु नं ज्याझ्वः दु ।
पीनिगू जिल्ला शाखां वइपिं द्वःछिम्ह प्रतिनिधितय्सं सम्मेलनय् ब्वति काइगु ज्याझ्वः दु। ज्याझ्वः ताःलाकेत नीस्वंगू उप समितित गठन यानाः भब्य तयारी जुयाच्वंगु खँ प्रचार प्रचार उप समितिया संयोजक नवीन चित्रकार 'सन्ध्या टाइम्स'यात कनादिल ।
