प्रचण्डया छेँय् अमेरिकी राजदूत
येँ (सन्ध्या टाइम्स)/नेपाःया निंतिं अमेरिकाया कार्यवाहक राजदूत एन्डी बेरीं माओवादी अध्यक्ष प्रचण्डयात थौं सुथय् नापलानादिल। उगु इलय् कार्यवाहक राजदूत बेरीं संक्रमणकालीन इलय् माओवादीं न्ह्याकीगु आन्दोलनं मुलुक झन हे संकटय् लाये फइगु खँ धासें आन्दोलन दिकेत इनाप यानादीगु खः ।
प्रचण्ड निवास खुसिबुँइ जूगु उगु खँल्हाबल्हाया झ्वलय् अध्यक्ष प्रचण्डं माओवादीया थुगु आन्दोलन शान्ति प्रक्रिया स्यंकाः न्हूगु संविधान दयेके मबीपिनिगु विरुद्ध जूगुलिं भ्रमय् मलायेत इनाप यानादीगु खः। खँल्हाबल्हाय् माओवादीयात स्वयेगु अमेरिकी दृष्टिकोण व माओवादीलिसे अमेरिकां स्वापू बांलाकेत चाहे जूगु बारे नं सहलह जूगु खः ।
