विराटनगरय् नेवाः राज्य अन्तक्रिया
स्वनिगलं पिने दकलय् न्हापांखुसी विराटनगरय् नेवाः स्वायत्त राज्यया बारे अन्तक्रिया ज्याझ्वः जुल । म्हिगः जूगु उगु ज्याझ्वलय् नेवाः देय् दबूया नायः व नेवाः स्वायत्त राज्य मंकाः संघर्ष समितिया दुजः मल्ल के. सुन्दरं नेवाः स्वायत्त राज्यया अवधारणयात कयाः ध्वाथुइकादीगु खः । थीथी राजनीतिक पार्टीइ संलग्न नेवाः राजनीतिक व्यक्तित्व व नेवाः बुद्धिजीवीतय्सं ब्वित काःगु उगु ज्याझ्वलय् भाजु मल्लं न्ह्यब्वयादीगु अवधारणायात कयाः थीथी न्ह्यसः तयादीगु खः ।
ज्याझ्वलय् समितिया सल्लाहकार पद्मरत्न तुलाधरं नेवाःतय्सं थःपिंत स्वायत्त राज्य माः धइगु खँ अझ नं मथूनि धासें उकिया बारे जनचेतना ब्वलंकेमाःगु खँ कनादिल । वय्कलं नेवाःतय् अग्राधिकार व आत्मनिर्णयया अधिकार बारे ध्वाथुइकेमाःगु खँय् बः बिसें थुकियात अझ व्यापक प्रचार यायेमाः धयादिल ।
ज्याझ्वलय् नेवाः पार्टी नीस्वनेमाःगु बारे नेपाः राष्ट्रिय पार्टीया प्रवक्ता किरण शाक्यं ध्वाथुइकादीगु खः । सहभागीतय्सं नेवाः स्वायत्त राज्यया बारे आपालं मनूतय्त जानकारी मदुगुलिं उकिया निंतिं थीथी जिल्लाय् नं थज्याःगु अन्तक्रिया यायेमाःगु बिचाः प्वंकूगु खः ।
