पोखरा-लखनउ उडान संचालन यायेत सरकारयात इनाप
येँ (सन्ध्या टाइम्स)/ नेपाःया नीजि ख्यः विमान सेवा कम्पनी बुद्ध एअरं याकनं हे पोखरा�लखनउ उडान संचालन यायेगु बारे क्यंगु उत्सुकतायात ताःलाकेगु निंतिं पोखराया पर्यटन व्यवसायीतय्सं नेपाल उद्योग वाणिज्य महासंघ मार्फत नेपाल सरकारयात तत्काल माःगु पलाः न्ह्याकेत इनाप याःगु दु ।
नेपाल सरकार व भारत सरकार दथुइ त्रिभुवन अन्तर्राष्ट्रिय विमानस्थल बाहेकं मेमेगु शहरं नं अन्तर्राष्ट्रिय उडान सुचारु यायेगु सम्बन्धय् निगू देय्या दथुइ जूगु सहमतिइ नेपाःया नीजि ख्यःया विमान सेवा कम्पनी बुद्ध एअरं दकलय् न्हापां अभिरुची क्यंगु खः ।
पोखरा-लखनउ उडान याकनं संचालन यायेगु निंतिं नेपाल उद्योग वाणिज्य महासंघया पुलांम्ह नायः आनन्दराज मुल्मीया संयोजकत्वय् पोखराया पर्यटन उद्योगया प्रतिनिधि सहितया छगू पोखरा अन्तर्राष्ट्रिय उडान सरोकार समिति नीस्वंगु खः ।
समितिया संयोजक मुल्मीया नेतृत्वय् वंगु छगू प्रतिनिधिमण्डलं महासंघया उपाध्यक्ष प्रदिपराज पाण्डेयात महासंघया सचिवालयय् नाप लानाः वइगु सन् २०१०या फेब्रुअरी महिना तकया दुने उगु रुटय् व्यवसायिक रुपं उडान संचालन यायेगु बुद्ध एअरया योजनायात ग्वाहालि यायेगु निंतिं सरकारं माःगु सुरक्षा व्यवस्था सहितया मेमेगु व्यवस्था यायेत जोड बिउगु खः ।
उगु प्रतिनिधिमण्डलं अन्तर्राष्ट्रिय उडानया निंतिं माःगु आवश्यक पूर्वाधारत गथेकि अध्यागमन, सुरक्षा, भंसार लगायतया मेमेगु पूर्वाधारया व्यवस्था तत्काल शुरु यायेत, उडानय् वइपिं यात्रुत च्वनेगु निंतिं प्रतिक्षालय, व्यागेज कालबिल यायेगु थाय्, सुरक्षा चेक जाँच यायेगु थाय्, विमानस्थलयात व्यवस्थित व सुचुकुचु यायेत नागरिक उड्डयन प्राधिकरणं यायेमाःगु ज्या, नेपाःया मेमेगु थासं नं अन्तर्राष्ट्रिय उडानयात लिपा थ्यंकं संचालन यायेफइगु वातावरण दयेकेगु, आकर्षक व सहुलियत हवाई भाडा कायम, ल्याण्डिङ्ग, पार्किङ्ग, ह्याण्डलिङ्ग, यात्रु सेवा शुल्क लिपा झंझट मजुइकथं मौजुदा व्यवस्थाय् लागु यायेत नं महासंघपाखे सरकारयात इनाप यायेत बः बिउगु दु।
उगु इलय् महासंघया पर्यटन व नागरिक उड्डयन समितिया सभापति बिके श्रेष्ठया नं उपस्थिति दुगु खः। वर्तमान इलय् देशय् मेगु अन्तर्राष्ट्रिय विमानस्थलया आवश्यकता, पर्यटन वर्ष�२०११, त्रिभुवन विमानस्थलय् अप्वया वनाच्वंगु यात्रुतय् चाप नापं नीजि ख्यलं उडान संचालनया निंतिं क्यंगु मनसुवा: पूवंकेत सरकारं सकतां कथंया खँय् ग्वाहालिया निंतिं माग यायेत नं महासंघयात इनाप याःगु खः ।
नेपाःया सर्गतय् भारतीय विमान
येँ (सन्ध्या टाइम्स)/ नेपाःया सीमा लागाय् इलय् व्यलय् भारतीय विमान अनधिकृत रुपं दुहां वयाः अनया वासिन्दातय्त ख्यायेगु प्रवृत्ति अझं दिउगु मदुनि ।
थ्व हे झ्वलय् दाङ जिल्लाय् नं वंगु छुं न्हि न्ह्यः थज्याःगु हे घटना हाकनं जूगु दु। अथे हे दाङया घोराहीइ नं म्हिगः न्हिनय् छगः विमानं कुं हे पिहां वयेक ब्वयाच्वंगु खनवं अनया वासिन्दातय् दथुइ ग्याःचिकु ब्वलंगु खः।
दार्चलाय् नं वंगु छुं दिं न्ह्यः भारतीय लडाकु विमान दुहां वःगु पुष्टि जुइधुंकूगु दु।उखे सुर्खेतया सर्गतय् ब्वयाच्वंगु जेट विमानं अन अन्तर्राष्ट्रिय उडानया न्हूगु हवाइ मार्गया लागिं परीक्षण याःगु दु ।
