संविधान निर्माणय् सक्रिय जुइत कोइरालायात इनाप
प्रचण्ड व अमेरिकी कार्यवहाक राजदूत दथुइ खँल्हाबंला
संविधान सभाया सभाध्यक्ष सुवाष नेम्वाङ व नेपाली कांग्रेसया सभापति दथुइ समसामयिक विषयलय् खँल्हाबंला जूगु दु ।
मंगलवाः सुथय् कोइराला निवास महाराजगंजय् जूगु खँल्हाबंलाय् बजेट पारित यायेगु विषय नापं संविधान निर्माण व शान्ति प्रकृयाया बारे सहलह जूगु खः । उगु ईलय् सभाध्यक्ष नेम्वाङं कोइरालायात संविधान निर्माण यायेगु ज्या सक्रिय जुइत इनाप यानादीगु खः ।
लिसःलय् कोइरालां थः उच्चस्तरीय राजनीतिक संयन्त्र निर्माण यायेगु पाखे लगेजुयाच्वंगु धयादिसें थकीया बारे प्रधानमन्त्री माधवकुमार नेपाल व माओवादी अध्यक्ष पुष्पकमल दाहाल 'प्रचण्ड' दथुइ खँल्हाबंला जूगु जानकारी बियादिल ।
अथेहे मंगलवाः सुथय् हे माओवादी अध्यक्ष पुष्पकमल दाहाल 'प्रचण्ड' व अमेरिकी कार्यवहाक राजदूत र्याण्डी बेरी दथुइ खँल्हाबंला जूगु दु ।
प्रचण्ड निवास न्हू बजारय् जूगु खँल्हाबंलाय् वर्तमान राजनीतिक गतिरोध, संविधान निर्माण, शान्ति प्रकृया, लडाकू समायोजन आदिया बारे सहलह जूगु खँ कार्यवाहक राजदूत बेरीं कनादिल । अथेहे खँल्हाबंलाय् माओवादी व अमेरिका दथुइया स्वापूया बारे नं खँल्हाबंला जूगु खः ।
