प्यलाः लिपाः संसदया बैठक
प्रमुख प्रतिपक्षी दल एकीकृत नेकपा (माओवादीं) प्यलाः तक निरन्तर अवरोध यानाः वयाच्वंगु व्यवस्थापिका संसदया बैठक सोमवाः च्वंगु दु । निर्धारित ई स्वयां घौच्छि लिपाः जक च्वंगु सोमवाःया बैठकय् थीथी झिंखुगु मन्त्रालयया विनियोजन विधेयकय् सहलह नापं सभासद्तय्सं थःथःगु बिचाः प्वंकूगु खः ।
बैठक न्ह्यायेवं माओवादी उपाध्यक्ष नारायणकाजी श्रेष्ठ 'प्रकाशं' न्ववानादिसें बजेट पारित याकेमबीगु माओवादीया चहाना मखुगु धयादिसें वर्तमान सरकारया कारणं आन्दोलनय् कुहांवयेमाःगु धयादिल । वयेकलं सरकार राजनीतिक गतिरोध ज्यंकेगु पक्षय् मदुगु द्वपं बियादिसें जनताया चहाना व भावनायात थुइकाः बजेट पारित यायेत माओवादीं संसद चायेके ब्यूगु धयादिल । वयेकलं थुकीयात माओवादीया कमजोरी कथं मकायेत नं इनाप यानादिल ।
नेता प्रकाशं न्ववायेवं माओवादीया सभासद्त बैठक स्थलं पिहांवंगु खः । माओवादी सभासद् बाहेक मेमेगू पार्टीया सभासद्तय्सं जक विनियोजक विधेयकय् सहलह याःगु खः ।
बैठकय् न्ववानादिसें कांग्रेस नेता डा. रामशरण महतं माओवादीयात अवसरवादीया संज्ञा बियादिल । वयेकलं माओवादी अवसरवादया निंतिं न्ह्याःगु यायेत नं तयार जूगु द्वपं बियादिसें माओवादीया धम्कीया न्ह्यने सुंनं मग्याइगु धयादिल । अथेहे बैठकय् सभासद्त हृदयेश त्रिपाठी, तिलक रावल लगायत सभासद्तय्सं नं न्ववानादीगु ख: ।
थ्वहे दथुइ सरकारं कन्हय् च्वनीगु व्यवस्थापिका बैठकं हे थुगु दँया बजेट पारित याकीगु जूगु दु । थौं सुथय् च्वंगु सत्ता साझेदार दलतय् बैठकं कन्हय्या बैठकं हे बजेट पारित याइगुलिं कन्हय्या बैठकय् दक्वं दलया सभासदय्तय्त अनिवार्य रुपं उपस्थित जुइत इनाप याःगु दु ।
