मन्त्रिपरिषद्या आकस्मिक बैठक
नेपाली कांग्रेसपाखें अवरुद्ध जुयाच्वंगु सदन सुचारु यायेगु बारे सहलह यायेत थौं सुथय् मन्त्रिपरिषदया आकस्मिक बैठकय् च्वन । कांग्रेस व सरकार दथुइ जूगु वार्ता लिपा कांग्रेसं ल्ह्वंगु मागयात संवोधन यायेगु निंतिं थ्व आकस्मिक बैठक च्वंगु खः ।
कांग्रेसं थिनं प्यन्हु न्ह्यवंनिसें थःपिंसं न्ह्यब्वयागु ९ बुँदे मागयात सरकारं संवोधन मयाःतले सदनय् च्वनेगु मखु धकाः बहिष्कार याना वयाच्वंगु खः । थौं सुथय्कांग्रेस व सरकारया प्रतिनिधि दथुइ जूगु वार्ता लिपा स्वंगू बुँदाया सहमति जूगु दु । सहमित कथं माओवादीं द्वन्द्वया इलय् कब्जा यानातःगु सम्पत्ति लित बीत समिति गठन यायेगु वाईसीएया अर्धसंरचना विघटन यायेगु व थीथी जिल्लाय् नीस्वनाच्वंगु शान्ति समिति नीस्वनेगु ज्यायात तुरुन्त दिकेगु खँ जूगु खः । उकियात हे कार्यान्वयन यायेगु बारे सहलह यायेत थौं मन्त्रिपरिषद्या बैठक च्वंगु खँ धाःगु दु । सेना समायोजन समितिइ कांग्रेस नं च्वनेगु धाःसां उकिया बारे धाःसा छुं निर्णय मजूनि ।
