जातीय राज्यय् पुनर्विचार ?
येँ (सन्ध्या टाइम्स)/ एकीकृत नेकपा (माओवादी) या आः न्ह्यानाच्वंगु केन्द्रीय समितिया बैठकय् स्थायी समितिया दुजः नापं जातीय मामिला इन्चार्ज देव गुरुङं न्हापा माओवादीं राज्य पुनर्संरचनाया निंतिं दयेकातःगु आधारय् हिउपाः हयेमाःगु प्रस्ताव तयादीगु दु ।
केन्द्रीय समितिया बैठक न्ह्यः तक नेता गुरुङं जाति, भाषा व क्षेत्रया आधारय् राज्य पुनर्संरचना यायेमाः धयाच्वंगु खःसां लिपांगु इलय् वयाः लिम्बु व खम्बु, नेवाः व तामाङतय् दथुइ सीमांकन यायेगु बारे पार्टी दुने हे विवाद ब्वलनेवं अति जातिवादी जुइ मजिउ धासें गुरुङं न्हूगु प्रस्ताव तयादीगु खः।
वय्कलं तयादीगु न्हूगु प्रस्तावय् जाति, भाषा, क्षेत्र, आर्थिक सम्भाव्यता, बसोबासया निरन्तरता, जनसंख्याया आधार दयेकाः राज्य पुनर्संरचना यायेमाःगु खँ दुथ्याःगु जानकारी छम्ह केन्द्रीय नेतां बियादीगु दु ।
भाजु गुरुङया थुगु प्रस्तावयात माओवादीया आपालं केन्द्रीय दुजःतय्सं नं समर्थन याःगु खँ सीदुगु दु।
थौं च्वनीगु माओवादी केन्द्रीय समितिया बैठकय् भाजु गुरुङं न्ह्यब्वयादीगु प्रस्तावयात कयाः सहलह जुइगु खँ माओवादी स्रोतं धाःगु दु। जातीय आधारय् जक राज्य पुनर्संरचना यात धाःसा उकिं बांमलाःगु लिच्वः लाये फुगु विश्लेषण यासें नेता गुरुङं थ्व न्हूगु प्रस्ताव तयादीगु खँ सीदुगु दु ।
