'सहमतिया राजनीति न्ह्यात'
येँ (सन्ध्या टाइम्स)/बजेट पारित याके बियाः माओवादीं सहमतीय राजनीतिइ विश्वास प्वंकूगु खँ गृह मन्त्री भीम रावलं धयादीगु दु। नेपालगञ्जय् प्रेस चौतारी नेपालं ग्वसाः ग्वःगु छगू ज्याझ्वलय् न्ववासें वय्कलं उगु खँ धयादीगु खः।
'बजेट पारित याके बियाः माओवादीं सहमतीय राजनीति प्रति विश्वास प्वंकूगु दु। आः माओवादीया मेगु मागया बारे नं मंकाः धारणा दयेकेगु जुइ।' वय्कलं धयादिल ।
वय्कलं संसद सुचारु जुइधुंकाः राजनीतिक सहमतिया कुतः नं सहज जूगु खँ धासें लोकतन्त्रय् विश्वास याइगु दलत नागरिक सर्वोच्चता प्रति प्रतिवद्ध जूगु खँ कनादिल।
वय्कलं सदन सुचारु जुयाः बजेट पास जुइधुंकाः सरकारया विशेष सुरक्षा योजना कार्यान्वयनय् सक्रियता अप्वइगु विश्वास प्वंकादिसें सुरक्षा योजना लागू जुइधुंकाः तथ्यांकीय रुपं शान्ति सुरक्षाया अवस्था सुधार जूगु दाबी नं वय्कलं यानादीगु दु ।
