सिंगापुर वार्ता बारे भ्रम
येँ (सन्ध्या टाइम्स)/माओवादी अध्यक्ष प्रचण्ड व कांग्रेस सभापति गिरिजाप्रसाद कोइरालाया दथुइ सिंगापुरय् जूगु धाःगु वार्ताया बारे माओवादीं पिने भ्रम न्यंकेगु व देशय् अस्थिरता ब्वलंकेगु कुतः यानाच्वंगु द्वपं कांग्रेसया कार्यवाहक सभापति सुशील कोइरालां बियादीगु दु ।
पोखराय् छगू पत्रकार सम्मेलनय् न्ववासें वय्कलं उगु खँ धयादीगु खः। वय्कलं न्ह्यःने धयादिल, 'पुलांगु समझदारी हे पालना मयाइपिं माओवादीतय्सं न्हूगु समझदारी याये धायेगु मछालापुसेच्वंगु खँ खः ।'
कांग्रेसयात आः सुनां नं ह्ययेकां ह्ययेके फइ मखु धासें माओवादीं कांग्रेसपाखें छुं आशा मयाःसां जिउ धकाः नं स्पष्ट यानादिल। माओवादी लडाकुयात सेनाय् समायोजन यात धाःसा देशय् द्वन्द्व ब्वलनीगु ख्याच्वः नं वय्कलं बियादिल ।
