सरकार-पत्रकार वार्ता

हिमाल मिडियाय् जूगु आक्रमणया विरोध यासें आन्दोलन याना वयाच्वंगु नेपाल पत्रकार महासंघ व सरकार दथुइ थौं सूचना तथा संचार मन्त्रालय वार्ता जूगु दु । उगु वार्ताय् माओवादी समर्थित कार्यकर्तातय्सं देय्या थीथी संचार माध्यमय् यानाच्वंगु आक्रमणयात तुरुन्त पनेगु व हिमाल मिडियाय् आक्रमणयाःवःपिं माओवादी कार्यकर्तायात ज्वनाः कारवाही यायेगु बारे सहलह जूगु खः । थिनं छुं न्हि न्ह्यः नं सरकार व पत्रकार महासंघ दथुइ सहलह जूगु खःसां उकी पत्रकार महासंघया प्रतिनिधितय्सं हिमाल मिडियाय् आक्रमण याःपिंत ज्वनाः कारवाही मयाःतले वार्ता मयायेगु धकाः अडान काःगु खः । पत्रकारतय् थ्व अडान लिपा हिमाल मिडियां नां किटे यानाः जाहेरी बिउपिं निम्ह माओवादी कार्यकर्तातय्सं प्रहरीइ वयाः आत्मसमर्थन यायेवं थ्व वार्ता जूगु खः । सरकारलिसे वार्ता जूसां पत्रकारतय् विरोध ज्याझ्वः जारी हे दु ।