मानन्धर अंकित ल्वहंपौ सुरक्षित
येँ (सन्ध्या टाइम्स)/येँया कंग लागाय् न्हूगु करिडर लँ दयेकूबलय् अथें वांछ्वयातःगु ऐतिहासिक ल्वहंपौ छगू आः केन्द्रीय मानन्धर संघं सुरक्षित याये कथं अन हे चायेकातःगु केन्द्रीय मानन्धर संघया सफूकुथी तये यंकूगु दु।
निसःत्यादँ न्ह्यः उगु लागाय् ल्वहँतं सीधुंकाः उकिया दसि कथं तयातःगु उगु ल्वहंपती मानन्धर खँग्वः नं उल्लेख जुयाच्वंगुलिं मानन्धर संघं हे उकियात सुरक्षित यायेगु लागिं पलाः न्ह्याकूगु खः ।
लँ दयेकूबलय् लँय् अथें वांछ्वया तःगु उगु ल्वहंपौ मानन्धर संघया उपसभापति रत्ननारायण न्हूजवाः साय्मि, छ्यांज्ये प्रेम साय्मि, लिउ छ्यांज्ये गणेश साय्मि व सफूकुथिया नायः लक्ष्मीबहादुर मानन्धरया पहलय् सुरक्षित यायेगु ज्या जूगु खः ।
उगु ल्वहंपौ व उकिया महत्व बारे वंगु वालय् च्वमि जितबहादुर मानन्धरं 'सन्ध्या टाइम्स'य् च्वसु च्वयादीगु खः ।
