नेप्से कुहां वनेगु मदिउनि
येँ (सन्ध्या टाइम्स)/शेयर बजाःया स्थिति अझं बांलाः मजूनि। नेपाल स्टक एक्सचेन्जय् जुयाच्वंगु शेयर कारोबारं नेप्से परिसुचक कुहां वयेगु म्हिगः नं जारी हे जुल। शेयर बजाः चालेवं छुं छझाः थहां खःथें मखुथें च्वंक थहां वंगु नेप्से वयां लिपा निरन्तर कुहां वल। म्हिगःया कारोबारं नेप्से कुहां वयाः झण्डै ५६० अंकं नं कुहां वयेधुंकूगु खः। तर कारोबार शुरु जूगु घौछि लिपा थहां वंगु नेप्से अन्त तक कायम जूसां वंगु वाःया कारोबारयात हाचां गाये धाःसा मफुत। थुकिं यानाः म्हिगः नं नेप्से कुहां वनेगु क्रमं निरन्तरता काल ।
नेप्से कुहां वनेगु क्रमं निरन्तरता कया च्वंगु इलय् उखे स्टक एक्सचेन्जय् जुयाच्वंगु कारोबारं गुगुं नं समुहया सुचक नं थहां वये फयाच्वंगु धाःसा मदु। म्हिगः नेप्से शुन्य दशमलव ९ अंकं कुहां वयाः ५६४ दशमलव ११ अंकय् थ्यंगु दु। सेन्सेटिभया कारोबार नं शुन्य दशमलव ६३ अंकं कुहां वःगु दु। अथे हे फ्लोट नं शुन्य दशमलव २ अंकं कुहां वल ।
शेयरय् बजारय् एभरेष्टया ३५/- तका व नविलया १०/- दां थहां वंसा मेगु आपालं वाणिज्य समुहया बैंकया शेयरय् धाः कुहां वयेवं म्हिगःया कारोबारं नेप्से २ दशमलव शुन्य ८ अंकं कुहां वयाः ५३८ दशमलव ८६ अंकय् थ्यंगु दु। अथे हे कुहां वःगु मेगु समुह मध्ये फाइनान्स समुह दकलय् अप्वः ४ दशमलव ३४ अंकं कुहां वनाः ५९५ दशमलव शुन्य ८ अंकय् थ्यंगु दु ।
मेखे विकास बैंक समुहया उपसुचक शुन्य दशमलव ५५ अंकं थहां वनाः ६२४ दशमलव ३९ अंक थहां वनाः अंकय् थ्यंगु दु। अथे हे वीमा समुह नं १ दशमलव ६१ अंकं थहां वयेवं ५९४ दशमलव ५४ अंकय् थ्यंगु दु। अन्य समुह ३ दशमलव ५२ अंकं थहां वनाः ६०२ दशमलव ७३ अंकय् थ्यन। उखे जलविद्युत समुह पाखे शेयर कारोबार जूसां छुं हे हिउपाः वःगु मदु ।
शेयर कारोबार जूगु कम्पनीमध्ये नीगुंगू कम्पनीया भाः कुहां वंगु दुसा नीगू कम्पनीया जक भाः थहां वन। मेगु च्यागू कम्पनीया भाः यथावत हे जुल। म्हिगःया शेयर बजारय् न्हय्खुद्वः व प्यसः व ख्वीगू कित्ता शेयर कारोबार जुयाः प्यंगू करोड नीन्हय्गू लाख पीनिद्व्क तका दांया कारोबार जुल। कारोबार कम्पनी मध्ये नं भिवोर विकास बैंकं दकलय् अप्वः पीच्यागू लाख प्यद्वः तका दांया कारोबार याःगु दु। जनरल फाइनान्स लिमिटेडं म्हिगःया कारोबारय् नं अप्वः कमे याःगु दुसा डिसिबीएल बैंकं दकलय् अप्वः द्यापं फयेमाल ।
दकलय् अप्वः २९९ क्वः तक शेयर कारोबार व १२,७०० कित्ता शेयर कारोबार भिवोर विकास बैंकं याःगु दु ।
