प्रचण्डं भ्रम ब्वलंकल : कोइराला
नेपाली कांग्रेसया कार्यवाहक सभापति सुशील कोइरालां एनेकपा (माओवादी)या अध्यक्ष पुष्पकमल दाहाल 'प्रचण्डं' सिंगापुरं वयाः भ्रम ब्वलंकूगु द्वपं बियादीगु दु । वयेकलं माओवादीं देशय् अस्थिरता ब्वलंकेत स्वःगु नं धयादिल । वयेकलं कांग्रेस सभापति गिरिजाप्रसाद कोइराला नाप सिंगापुरय् जूगु खँल्हाबंला बारे प्रचण्डं मखूगु खँ धयाः भ्रम ब्वलंकूगु द्वपं बियादिल ।
प्रेस युनियन कास्कीं सोमवाः पोखराय् याःगु पत्रकार सम्मेलनय् कोइरालां कांग्रेसं माओवादीयात जंगलं सिंहदरवार तक हःगुलिं आः उमित बीत छुं नं मदुगु धयादिल । वयेकलं आः कांग्रेसयात न्ह्याकू ह्येकूसां छुं मजुइगु धयादिसें कांग्रेस पाखें छुं आशा दुसाः उकीयात त्याग यायेत माओवादीयात इनाप यानादिल ।
वयेकलं प्रचण्डं शान्ति सम्झौतायात निष्कर्षय् थ्यंकीगु विश्वास गिरिजाबाबुयात दुसां थःयात मदुगु स्पष्ट यानादिल । पुलांगु सम्झदारी हे माओवादीं कार्यान्वयन मयागुलिं न्हूगु समझदारी यायेगु धकाः माओवादीं धाःगु खँ लज्जास्पद जूगु नं वयेकलं धयादिल ।
वर्तमान सरकारयात नेपाली कांग्रेसया पूर्ण समर्थन दुगु धयादिसें वयेकलं थ्व सरकारया विकल्प मदुगु धयादिल । वयेकलं माओवादीं राष्ट्रपतियात अनावश्यक दोष बियाः नागरिक सर्वोच्चताया माग यानाः आन्दोलन यायेगुया छुं औचित्य मदुगु टिप्पणी यानादिल ।
