पञ्चेश्वर विकास प्राधिकरण गठन यायेगु सहमित
नेपाः व भारत दथुइ बहुचर्चित पञ्चेश्वर परियोजना कार्यान्वयनया महत्वपूर्ण कडीया कथं दुगु पञ्चेश्वर विकास प्राधिकारण गठन यायेगु सहमति जूगु दु । थ्व सहमति नापं पञ्चेश्वर कार्यान्वयन जुइगु ज्या सतीगु दु ।
पोखराय् आइतवाः क्वचाःगु नेपाः भारत जलश्रोत सचिव स्तरीय बैठकय् आगामी जनवरीया अन्त्य तक प्राधिकरण गठन सम्बन्धी दक्वं प्रकृया निगूलिं देय्या सरकारं स्विकृति याइ । बैठक लिपाः नेपाः पक्षया नेतृत्व यानादिम्ह उर्जा सचिव शंकर कोइरालां प्राधिकरण गठनया निंतिं प्रतिस्प्रधा मार्फत प्रमुख कार्यकारी अधिकृत नियुक्ति यायेगु सहमति जूगू कनादिल । नापं वयेकलं संचालक समितिलय् निगूलिं देय्या बराबरी पदाधिकारी दुथ्याइगु सहमति जूगु कनादिल ।
अथेहे बैठकय् लक्ष्मणपुर बांधं लाःगु डुबान समस्या निरुपण यायेगु सहमति नं जूगु दु । प्यदँ न्ह्यः तत्कालीन नेपाः भारत उच्चस्तरीय प्राविधिक समिति (एचएलटीसीं) नं लक्ष्मणपुर डुबान समस्या समाधान यायेत सहमति याःगु खः । सहमति जुसां नं भारतं छुं वास्ता मयाःगुलिं छुं प्रगति जुइमफुगु खः ।
नापं लोडसेडिङ तत्काल म्हो यायेत विद्युत आपुर्ति व प्रसारण लाईन सम्बन्धी धाःसा व्यापारिक सम्झौताया निंतिं कुटनिटीक माध्यमं भारतय् छ्वयेगु निर्णय याःगु दु । उगु हे बैठकं निगूलिं देय्या जलस्रोत मन्त्रीस्तरीय बैठक २०१०या जनवरीलय् यायेगु सहमति याःगु दु ।
बैठकय् भारतया जलस्रोत सचिव उमेशनारायण पञ्जियारं नेतृत्व याःगु झिंप्यम्ह दुजः दुगु पुचः व नेपाःया पाखें कोइरालाया नेतृत्वय् झिंखुम्ह दुजः दुगु पुचलं ब्वति काःगु खः ।
