एमालें बजेटया पक्षय् मतदान यायेत सभासद्तय्त ह्वीप जारी
नेकपा (एमालें) बजेटया पक्षय् मतदान यायेत दक्वं सभासद्तय्त ह्वीप जारी याःगु दु । आइतवाः एमालेया संविधानसभा दलया ज्याकूथीं जारी याःगु ह्वीप कथं मंसिर ८, ९ व १० गते व्यवस्थापिका संसदया बैठकय् दक्वं सभासद्त अनिवार्य उपस्थित जुइमाःगु दु ।
एमालेया मुख्य सचेतक भीम आचार्ययं जारी यानादीगु ह्वीपय् थ्वहे मंसिर ८, ९ व १० गते व्यवस्थापिका बैठकय् अनिवार्य उपस्थित जुयाः २०६६/६७या निंतिं नेपाः सरकारं न्ह्यब्वःगु विनियोजन विधयेक व वनाप सम्बन्धित मेगू आर्थिक विधेयकतय् पक्षय् मतदान यायेत एमालेया दक्वं माननीय सभासद्तय्त एमाले संविधानसभा दलया विधान कथं निर्देशन याःगु खँ न्ह्यथंनातःगु दु ।
कार्य व्यवस्था समितिया निर्णय कथं ८ गते विनियोजन विधेयकय् सहलह जुइगु, ९ गते आर्थिक विधेयकय् सहलह यायेगु नापं प्रधानमन्त्री व मन्त्रीयतय्सं उकी लिसाः बीगू व १० गते बजेट पारित यायेगु ज्याझ्वः क्वछीनातःगु दु ।
आन्दोलनरत एनेकपा (माओवादीं) बजेट पारित यायेगु निंतिं स्वन्हु संसदया बैठक अवरुद्ध मयायेगु निर्णय यायेवं अन्ततः थुगुसीया बजेट पारित मंसिर १० गते जुइत्यंगु दु ।
