प्रधानमन्त्री नेपाल व कोइराला दथुइ खँल्हाबंला
सिंगापुरय् वासः याकाः थौं तिनि येँ लिहांझायादीम्ह नेपाली कांग्रेसया सभापति गिरिजाप्रसाद कोइराला व प्रधानमन्त्री माधवकुमार नेपाल दथुइ खँल्हाबंला जूगु दु ।
कोइराला येँ थ्यंनेवं आइतवाः प्रधानमन्त्री नेपाल कोइराला निवास महाराजगञ्ज वनाः कोइरालाया स्वास्थ्य अवस्था बारे जानकारी कयादीगु खः । नापं निम्ह नेता दथुइ राजनीतिक गतिरोध अन्त्य व माओवादी नाप यायेगु वार्ताया विषयलय् सहलह जूगु खः । अथेहे उच्चस्तरीय राजनीतिक संयन्त्र गठन यायेगु विषयलय् नं प्रधानमन्त्री नेपाल व कोइराला दथुइ सहलह जूगु खः ।
खँल्हाबंलाय् प्रधानमन्त्री नेपालं सिंगापुरय् कोइराला व माओवादी अध्यक्ष पुष्पकमल दाहाल 'प्रचण्ड' दथुइ जूगु खँल्हाबंलाया बारे च्यूताः प्वंकादीगु खः । कोइरालां माओवादी अध्यक्ष दथुइ जूगु खँल्हाबंलाय् राजनीतिक गतिरोध अन्त्य यायेगु व संसद चायेकीगु बारे खँल्हाबंला जूगु जानाकारी ब्यूगु खँ कांग्रेस नेता कृष्ण सिटौलां कनादिल । सिटौलां कोइरालां वर्तमान सरकार परिवर्तनया बारे माओवादी अध्यक्ष नाप खँ मजूगु जानकारी नं प्रधानमन्त्रीयात यानादीगु कनादिल ।
सहलह लिपाः प्रधानमन्त्री नेपालं पत्रकारत नाप खँल्हाबंला यानादिसें बजेट पास याकेग व राजनीतिक गतिरोध अन्त्यया निंतिं उच्चस्तरिय राजनीतिक संयन्त्र गठनया विषयलय् खँल्हाबंला जूगु कनादिल ।
