कोइराला लिहांझाल
नेपाली कांग्रेसया सभापति गिरिजाप्रसाद कोइराला आइतवाः येँ लिहांझायादीगु दु । सिल्क एअरया विमानं न्हिनय् झिंनिताः ईलय् वयेक येँ थ्यंकादीगु खः । वयेक नापं उपप्रधानमन्त्री नापं कोइरालया म्हाय् सुजाता कोइराला व चिकित्सकतय् पुचः नं नापं लिहांवःगु खः ।
उपप्रधानमन्त्री सुजाता कोइरालां सभापति कोइरालाया स्वस्थ्य अवस्था बांलागु जानकारी बियादिसें सिंगापुरय् चिकित्सकतय्सं लच्छि लिपाः हाने वासः याकेत सुझाव ब्यूगुलिं लच्छि लिपाः उखे यंकेगु कनादिल ।
कोइरालाया हिइ अक्सिजनया मात्रा म्हो जुया थप वासः याकेत वंगु शनिवाः वयेकयात एअर एम्बुलेन्सय् तयाः सिंगापुरय् यंकूगु खः । वयेकया वासः सिंगापुरया ग्लेनेगल्स हस्पिटल एण्ड मेडिकल सेन्टरय् जूगु खः । अन यंकेस्वयां न्ह्यः वयेकयात येँया बाँसबारीइ च्वंगु सहिद गंगालाल हृदय केन्द्रय् वासः याकातःगु खः ।
सिंगापुरय् कोइरालां एनेकपा (माओवादी)या अध्यक्ष पुष्पकमल दाहाल 'प्रचण्ड' नाप राजनीतिक गतिरोधया बारे सहलह यानादीगु खः ।
कोइरालायात लसकुस यायेत कांग्रेस संसदीय दलया नेता रामचन्द्र पौडेल लगायत आपालं नेता व कार्यकतात त्रिभुवन अन्तराष्ट्रिय विमानस्थलय् थ्यंकूगु खः ।
