२६ गतेनिसें गणराज्य घोषणा
येँ (सन्ध्या टाइम्स)/मंसिर २६ गते निसें पुस ४ गते तक स्वायत्त गणराज्य घोषणा जुइगु खँ माओवादी नेता नेत्र बिक्रम चन्द (विप्लवं) धयादीगु दु ।
थौं छगू सञ्चार माध्यमलिसे खँ ल्हासें वय्कलं संविधानसभापाखें संघीय गणराज्य व संविधान जारी जुइ फइगु सम्भावना मदुगुलिं सतकं हे घोषणा यायेमाःगु बिचाः प्वंकादीगु खः ।
वय्कलं न्ह्यःने धयादी, 'माओवादीं घोषणा याइगु गणराज्यतय्सं समानान्तर सरकार न्ह्याकी ।'
तर म्हिगः तिनि माओवादीं घोषणा याःगु लछियंकंया आन्दोलनया ज्याझ्वलय् धाःसा गणराज्य घोषणाया ग्वसाः मदु ।
माओवादीं निक्वःगु चरणया आन्दोलनया झ्वलय् नं थीथी स्वायत्त गणराज्य घोषणा यायेगु धकाः तयारी याःगु खःसां लिपा उकिया लागिं आन्तरिक तयारी मगाःगुलिं धकाः ज्याझ्वः स्थगित याःगु खः। गणराज्य घोषणा ज्याझ्वःपाखें देशय् अराजकता ब्वलनी धकाः विदेशीतय्सं नं चिउताः प्वंकूगु खः ।
