'संविधान अस्वीकृत जुइफु'

येँ (सन्ध्या टाइम्स)/ यदि आः दयेकीगु संविधानय आत्मनिर्णयया अधिकार नापं जातीय भाषिक स्वायत्तता व स्वशासनया अधिकार सुनिश्चित मयात धाःसा उगु संविधान जारी यायेवं हे आदिवासी जनजातितय्सं विद्रोह यानाः संविधानया विरुद्ध आन्दोलन यायेगु निर्णय याःगु दु। म्हिगः च्वंगु आदिवासी जनजाति खलः पुचः व बुद्धिजीवीतय् छगू वृहत् भेलां थ्व निर्णय याःगु खः। थुकिया निंतिं भेलां नीस्वंगू आदिवासी जनजाति वृहत् मोर्चा, नेपाः अन्तर्गत परिषद् व नीन्हय्म्ह दुजः दुगु छगू संघर्ष समिति नं नीस्वंगु दु।
उगु संघर्ष समितिपाखें आः याकनं हे प्रधानमन्त्री, सभामुख आदिपिंत ज्ञापनपत्र बियाः थःपिंसं याये फुगु विद्रोहया जानकारी बीत्यंगु दु। संघर्ष समितिइ थीथी जातीय पुचःया प्रतिनिधित ज्वंगु दु ।

मस्यौदा च्याकीगु

संविधानसभाया मौलिक अधिकार तथा राज्यया निर्देशक सिद्धान्त समितिं तयार याःगु मस्यौदायात जनजातितय्सं छ्वयेकीगु जूगु दु। उकी जनजातिया आत्म निर्णयया अधिकार सुनिश्चित मयाः धासें उकियात च्याकेत्यंगु खः। थौं संविधानसभाया २ नं. गेटय् मस्यौदा च्याकी ।