लिहां वल कोइराला
येँ (सन्ध्या टाइम्स)/ सिंगापुरय् वासः याकाच्वंम्ह नेपाली कांग्रेसया सभापति गिरिजाप्रसाद कोइराला थौं येँय् लिहां झाःगु दु ।
सभापति कोइराला शिल्क एयरया विमानं थौं नेपाः लिहां झाःगु खः। वय्कःया लिसें वय्कःया म्ह्याय् व उपप्रधानमन्त्री सुजाता कोइराला नापं कायचा शेखर कोइराला नं लिहां झाःगु दु ।
सभापति कोइरालायात नेपाः हयेगु निंतिं गंगालाल ह्दय रोग केन्द्रया डा. मानबहादुर केसी म्हिगः सिंगापुर झाःगु खः।
कोइराला येँय् लिथ्यनेवं नेपाःया राजनीतिक गतिरोध ज्यनीगु अनुमान थन यानाहःगु दु। कोइरालायात माओवादी अध्यक्ष प्रचण्डं सिंगापुरय् वनाः नापलासें राजनीतिक सहमति कायम याःगु चर्चाय् वयाच्वंसां वय्कःपिनि दथुइ गज्याःगु सहमति जुल धइगु खँ धाःसा सीमदुनि।
येँय् लिहां वयेवं थनया त्रिभुवन अन्तर्राष्ट्रिय विमानस्थलय् पत्रकारतय्सं वय्कःयाके छुं न्यनेगु कुतः याःगु खःसां कोइराला धाःसा छुं न्वमवासे वनादिल ।
थ्वहे झ्वलय् कोइरालाया म्ह्याय् सुजाता कोइरालां कनादी कथं थौं बहनी हे सभापति कोइरालां छगू पत्रकारत हे यानाः देयया वर्तमान राजनीति बारे थःगु धापू सार्वजनिक यायेत्यंगु दु ।
