मचा किपा धेंधेंबल्लाः क्वचाल
येँ (सन्ध्या टाइम्स)/नेपाल-जापान सांस्कृतिक संघ व बसन्त ऋतु स्कुलया ग्वसालय् मचा किपा च्वयेगु धेंधेंबल्लाः कासा क्वचाल ।
स्वय्म्भुया राष्ट्रिय प्राकृतिक संग्रहालय जूगु उगु धेंधेंबल्लाः कासाय् झिंप्यंगू स्कुलया छगू तगिंनिसें १० तगिं तकाया ७० म्ह विद्यार्थीपिंसं ब्वति काःगु खः ।
धेंधेंबल्लाः १-२ तगिंया 'माइ ह्याप्पी टाइम' शिर्षकया धेंधेंबल्लाय् बसन्त ऋतुया बिसिजान श्रेष्ठ, लाःगु खःसा इच्छा सिंह व विवेक सिजापति लिउ, लियांलिउ लाःगु खः।
अथे हे ३-५ तगिंया 'इन्भाइरोमेन्ट' शिर्षकया धेंधेंबल्लाः कासाय् श्री गणेश हिमालया मनू गुरुङ न्हाप लाःगु खःसा विजय सिजापति मगर व कुमुदिनी पन्त लिउ व लियांलिउ लाःगु खः ।
'पिस' शिर्षकय् जूगु ६-८ तगिंया श्री गणेश हिमालया रेणु गुरुङ न्हाप लाःगु खःसा दिपशिका हाई स्कुलया लिउ व राइजिङ्ग स्टारया रसेल श्रेष्ठ लियां लिउ लाःगु खः।
'नेपाल-जापान कल्चर' शिर्षकय् ९-१० तगिंया विद्यार्थीतय् दथुइ जूगु धेंधेंबल्लाः कासाय् कन्या हाई स्कुलया रोसनी डंगोल न्हाप लाःगु दुसा दिपशिखाया रुसु श्रेष्ठ लिउ व अक्सिडेन्टलया सुमन गुरुङ लियां लिउ लाःगु दु।
ज्याझ्वःया निर्णायक मण्डलय् ललित क्याम्पसया प्राध्यापक राधेश्याम मुल्मी, के.जी रन्जितपिं च्वनादीगु खः। ज्याझ्वः नेपाल जापान मैत्री संघया अध्यक्ष डा. बीपी भण्डारीया सभापतित्वय् जूगु खः।
