थ्व वाःया कारोबारय् नं नेप्से क्वय्
येँ (सन्ध्या टाइम्स)/स्टक एक्सचेन्जय् शेयर कारोबारं नेप्से परिसुचक कुहां वयेगु क्रमं थ्व वालय् नं निरन्तरता काःगु दु। तर थ्व वालय् छवाः न्ह्यःया कारोबारय् थें धाःसा कुहां मवः। वंगु वालय् २१ अंकं कुहां वंगु नेप्से थुगु वाःया कारोबारय् ३ दशमलव ९३ अंकं कुहां वल। वाःया न्हापांगु ५६६ दशमलव ९४ अंकं शुरु जूगु शेयर कारोबार लिपांगु न्हि ५६३ दशमलव शुन्य १ अंकय् थ्यंकाः बजाः बन्द जूगु खः ।
थ्व छवाःया दुने स्टक एक्सचेन्जय् चय्गुंगू कम्पनीया ४५२१ गू कारोबारं नीखुगू करोड चय्न्हय्गू लाख ग्वीन्याद्वः तका दां बराबरया न्हय्गू लाख न्हय्न्हय्द्वः व च्यासः कित्ता शेयर कारोबार जुल। वंगु वालय् ५४०८ कारोबारं खुगू लाख व निद्वः व खुसः कित्ता शेयर न्याये-मी जुयाः स्वीछगू करोड झिंछगू लाख ख्वीखुद्वः तका दांया कारोबार जूगु खः ।
थ्व वालय् नेप्सेय् जूगु कूल कारोबारय् 'क' वर्गय् लाःगु कम्पनीया जक झिंछगू करोड झिंनिगू लाख तका बराबरया कारोबार जुल। थ्व नेप्से जूगु कूल कारोबारया ४१ दशमलव ३९ प्रतिशत खः ।
नेप्सेय् जूगु कारोबारय् 'क' लाःगु कम्पनीया कारोबार मापन याइगु सेन्सेटिभ वाःया न्हापांगु न्हिया तुलनाय् शुन्य दशमलव ६३ अंकं कुहां वनाः १४१ दशमलव ३२ अंकय् थ्यंगु दु ।
थ्व वाःया कारोबारय् स्वंगू करोड न्हय्न्यागू लाख दां कारोबार याःगु लिधंसाय् डिसिबीएल निगू लाख नीनिद्वः कित्ता शेयर न्याये-मी जूगु लिधंसाय् सिएमबी फाइनान्स व दकलय् अप्वः च्यासः व ख्वीन्हय्गू कारोबार याःगु लिधंसाय् भिवोर विकास बैंक दकलय् न्ह्यःने लाःगु दु ।
