बजेट पास यायेत स्वन्हूया निंतिं संसदया बैठक चायेकीगु/आन्दोलनया ज्याझ्व: नं घोषणा
आन्दोलनरत एकीकृत नेकपा (माओवादीं) बजेट पास यायेत स्वन्हूया निंतिं व्यवस्थापिका संसदया बैठक चायेकेगु निर्णय या:गु दु । वंगु प्यला: निसें अवरुद्ध व्यवस्थापिका संसदया बैठक जनता, राष्ट्र, कर्मचारी, सुरक्षा निकायप्रति जिम्मेवार धासें माओवादीं उगु निर्णय या:गु खँ धा:गु दु ।
अथेहे माओवादीं स्वंगूगु चरणया आन्दोलन कथं आमहड्ताल सहितया आन्दोलनया ज्याझ्वः घोषणा याःगु दु । राष्ट्रपति डा. रामवरण यादवं प्रधानसेनापतियात थमौति ब्यूगु पला पाखें निगू सत्ता कायम जूगु धासें नागरिक सर्वोच्चताया माग यानाः आन्दोलन यानाच्वंगु माओवादीया शनिवाः न्हिनय् च्वंगु केन्द्रीय समितिया बैठकं स्वंगूगु चरणया आन्दोलनया घोषणा याःगु खः ।
पार्टीया मू ज्याकू पेरिस डाँडाय् च्वंगु बैठकं आन्दोलनया ज्याझ्वः कथं मंसिर ७ निसें १५ तक प्रचार प्रसार, १६ निसें २६ तक जनवर्गीय संगठनयात प्रशिक्षण व मंसिर २६ निसें पुष ४ तक जातीय मोर्चाया प्रशिक्षण व विरोध ज्याझ्वः तय याःगु दु । अथेहे पुष ५, ६ व ७ लिपाः अनिश्चितकालीन आमहड्तालया घोषणा याःगु दु ।
माओवादीं सहमतिया निंतिं सरकारयात मंसिर ५ तकया अल्टिमेटम ब्यूगु खः । अल्टिमेटम क्वचायेवं माओवादीया बैठकं थुगु आन्दोलनया न्हूगु ज्याझ्वः सार्वजनिक याःगु खः ।
बैठक लिपा पार्टीया निर्णय सार्वजनिक यायेत ग्वसा:ग्वा:गु पत्रकार सम्मेलनय् माओवादी अध्यक्ष पुष्पकमल दाहाल 'प्रचण्डं' नागरिक सर्वोच्चता व राष्ट्रपतिया विषयलय् पटक पटक सरकारनाप वार्ता याना: नं निकास पिहांमवगुलिं जिम्मेवार पार्टीया हैसियतं सदन चायेकेगु निर्णय याना:गु कनादिल । नापं वयेकलं पार्टीनाप थीथी चरणया वार्ता याना: नं छुं सहमति मजुइवं स्वंगूगु चरणया आन्दोलन घोषणा यायेत बाध्य जूगु धयादिल ।
