वर्तमान सरकार प्राकृतिक व स्वभाविक : प्रधानमन्त्री
प्रधानमन्त्री माधवकुमार नेपालं वर्तमान सरकार प्राकृतिक व स्वभाविक जूगु दाबी यानादिसें जनप्रतिनिधिया बहुमत शक्तिया आधारय् गठन जूगु सरकार सुयां कतामरी मजूग खँ धयादीगु दु ।
एमालेया केन्द्रीय सम्पर्क समन्वय समितिं शनिवाः येँया राष्ट्रिय सभागृहलय् याःगु ज्याझ्वलय् न्ववानादिसें वयेकलं नागरिक सर्वोच्चताया माग यानाः माओवादीं याःगु आन्दोलन अनावश्क जूगु टिप्पणी यानादिल । वयेकलं नागरिक सर्वोच्चताया परिभाषा छुं नं छगू दलया जक जुइ मफइगु धयादिसें माओवादीं यानाच्वंगु नागरिक सर्वोच्चताया परिभाषा थःगु नेतृत्वया सरकार गठनय् केन्द्रीत जूगु द्वपं बियादिल ।
माओवादीं थुगु आर्थिक दँया बजेट पारित यायेमब्यूसाः देय् आर्थिक संकटय् फसेजुइगु व देय् अस्तव्यस्त जुइगु धयादिसें थथे जुसाः थुकीया दोष माओवादीयात हे वनीगु धयादिल । वयेकलं न्हापाया दँ स्वयां १९ प्रतिशत अप्वः राजश्व संकलन जुसां बजेट पारित जुइमफुगु खँय् आपत्ति प्वंकादिल ।
अथेहे ज्याझ्वलय् वयेकलं एमालेया हित चाहे मजूपिं एमाले नेतात पार्टी दुने च्वनाच्वने आवश्यक मजूगु धयादिल । एमाले च्वनाः मेगू पार्टीया प्रचार यानाः जुइपिंत थःगु पार्टी दुने थाय् बी आवश्यक मजूगु धयादिल । अज्याःपिं नेतातय् म्ह जक एमालेया जूगु धयादिसें वयेकलं आत्मा धाःसा एमालेया जुइमफुगु धयादिल ।
