'सहमति मजुसाः सरकारं पियाच्वनी मखु'
सूचना व संचार मन्त्री शंकर पोखरेलं आन्दोलनरत एनेकपा (माओवादी) नाप सहमतिया नांमय् सरकारं ताः ई तक पियामच्वनीगु खँ धयादीगु दु । वयेकलं सरकारं अधिकतम लचकता क्यनाच्वंगु धयादिसें माओवादीयात नं लचकता क्यनेत इनाप यानादिल ।
शनिवाः पोखराय् जूगु साप्ताहिक पाक्षिक पत्रिका राष्ट्रिय सञ्जालया पश्चिमाञ्चल स्तरीय क्षेत्रीय भेलाय् न्ववानादिसें वयेकलं देय् आर्थिक संकटय् वनेत्यंगुलिं आः माओवादीं सहमति मयातल्ले सरकारं बजेट पारित यायेत पियामच्वनीगु धयादिल । वयेकलं देय्यात आर्थिक संकट पाखें बचे यायेगु जिम्मा माओवादीया नं जूगु धयादिसें बजेट पारित यायेत माओवादीयात इनाप यानादिल ।
वयेकलं न्ह्याक्वः हे मनूतय्त सतकय् हयाः आन्दोलन यासां अन्तिमय् सहमतिया माध्यमं हे समस्या समाधान जुइगु धयादिसें जनतायात दुःख बियाः आन्दोलन यानाच्वने जरुरी मजूगु धयादिल ।
