मन्त्रीत सुथय् हे प्रधानमन्त्री निवासय्
संविधान सभाय् दकलय् तःधंगु दल एनेकपा (माओवादीं) राजनीतिक गतिरोध अन्त्य यायेगु निंतिं सरकारयात ब्यूगु अल्टिमेटम क्वचायेवं मन्त्रीत सरकारया आगामी रणनीतिया बारे सहलह यायेत व्यस्त जूगु दु ।
प्रधानमन्त्रीया सरकारी निवास बालुवाटारय् शनिवाः सुथय् हे प्रधानमन्त्री माधवकमुर नेपाल उपप्रधानमन्त्री विजयकुमार गच्छदार, अर्थमन्त्री सुरेन्द्र पाण्डे व शान्ति मन्त्री रकम चेम्जोङ दथुइ आगामी राणनीतिया बारे खँल्हाबंला जूगु दु ।
खँल्हाबंलाय् बजेट पारित यायेगु नापं माओवादीं याये धाःगु स्वक्वःगु आन्दोलनया बारे सहलह जूगु खः । बैठक लिपाः पत्रकारत नाप खँल्हाबंला यानादिसें उपप्रम गच्छदारं सहमति मजूसाः सरकारं मेगु हे उपाय मालाः बजेट पारित यायेगु निर्णय जूगु कनादिल ।
उखे माओवादी नं थःगु पार्टीया आगामि रणनीति क्वछीत सुथं निसें बैठक च्वनाच्वंगु दु । सुथय् पार्टी ज्याकू पेरिस डाँडाय् च्वंगु पोलिटब्यूरोया बैठकं अझ नं सहमतिया निंतिं कुतः यायेगु व तत्काल आन्दोलन घोषणा मयायेगु निर्णय जूगु खँ सीदुगु दु ।
थौं हे न्हिनय् च्वनीगु पार्टी केन्द्रीय समितिया बैठकय् थुगु निर्णय पेश यानाः आगामि रणनीति क्वछीगु निर्णय याःगु दु ।
