माओवादी नेतृत्वय् सरकार गठन जुइगु सम्भावना मदु : कोइराला
नेपाली कांग्रेसया कार्यवाहक सभापति सुशील कोइरालां तत्काल माओवादीया नेतृत्वय् सरकार गठन जुइगु सम्भावना मदुगु दाबी यानादीगु दु ।
प्रेस युनियनं शनिवाः चितवनया भरतपुरय् याःगु पत्रकार सम्मेलनय् न्ववानादिसें वयेकलं वर्तमान सरकारं हे न्हूगु संविधान जारी याइगु व शान्ति प्रकृययात क्वचायेकीगु दाबी यानादिसें छुं नं हालतं माओवादीया सरकार गठन जुइगु सम्भावना मदुगु स्पष्ट यानादिल । वर्तमान सरकारया हे पक्षय् कांग्रेस दुगु धयादीगु ख:सां वयेकलं थ्व सरकारं बिचाः याःगु कथं ज्या यायेमफुगु धयादिल ।
माओवादीया माग कथं राष्ट्रपति विरुद्ध संकल्प प्रस्ताव सदनय् यंकेगु खँ कांग्रेसयात मान्य मजुइगु धयादिसें कांग्रेस कार्यवहाक सभापति कोइरालां अन्तरिम संविधान संशोधन यायेमज्यूगु धयादिल ।
वयेकलं बजेट पास यायेत सहमतिया बाहेक मेगू विकल्प मालेमफुगुलि सभामुख जिम्मावेर जूगु द्वपं बियादिसें सरकार व माओवादी दथुइ सहमति मजुसा: मेगु हे उपाय मालाः बजेट पारित याकेत सभामुखयात इनाप यानादिल ।
