शान्ति प्रकृया अवरुद्ध जूगु प्रति कूटनीतिक नियोगया प्रमुखत चिन्तित
नेपालय् दुगु कूटनीतिक नियोगया प्रमुखतय्सं स्थायी शान्ति हासिल यायेत ल्ह्वंगु लपाः अवरुद्ध जूगु धासें चिन्ता प्वंकूगु दु ।
बृहद शान्ति सम्झोता जूगु स्वदँ क्यंगु लसताय् शुक्रवाः पिथंगु विज्ञप्तिइ सम्झौताय् निहित शब्द व भावना पालना यायेत इनाप याःगु दु । संविधानसभा निर्धारित ई स्वयां ल्यूने लानाच्वंगु व नेपाःया भावी संरचना व शासकीय स्वरुप बारे आः तक नं सहमति जुइमफुगु खँ न्ह्यथंसें छगू दृष्टिकोणय् सहमति यायेत इनाप या:गु दु । अथेहे ईलय् हे संविधान च्वयेगु मफुसाः नेपाली नागरिकया आशा व आकांक्षाया स्पष्ट उपेक्षा जुइगु खँ नं न्ह्यथंनातःगु दु ।
विज्ञप्तिइ द्वन्द्वकाय् जूगु मानवअधिकार उल्लंघनया घटना सम्बोधन यायेगु इच्छा शक्ति म्हो जूगु व निरन्तरया दण्डहीनतायात सम्बोधन यायेगु अनिच्छा खँगु धासें द्वन्द्व पीडितयात न्याय बीगु बचं याःगु संरचना कार्यान्वयनय् मवःगु खँ प्रति च्यूताः प्वंकूगु दु ।
थथे विज्ञप्ति पिथनेगु देय्लय् अष्ट्रेलिया, क्यानडा, डेनमार्क, युरोपेली आयोग, फिनल्याण्ड, फ्रान्स, जर्मनी, इजरायल, जापान, निदरल्याण्ड्स, नर्वे, दक्षिण कोरिया, स्वीट्जर्ल्याण्ड, बेलायत व अमेरिकाया नियोग दु ।
